-27 °С
Пылан
Все новости
Илыш пасу
20 Сорла , 09:35
«60 ий - илышын эн сай пагытше»
Усола ялыште илыше Людмила Шамыкаеван 60 ияш лӱмгечыжлан пӧлеклалтше пайрем касше эртыш. Тудо ямле Еммет ялеш шуко икшыван ешыште шочын. Ачаже Мурзабай Галеев Кугу Ачамланде сарын участникше лийын, аваже Анфия Ильинична сар жапыште Янахмат школышто йоча-влакым туныктен. Сар деч вара коктынат «Сюнь» колхозышто тыршеныт. 10 икшыван ешыште Людмила индешымше йоча лийын. Аважым «Мать-героиня» медаль дене наградитленыт.
Авторын фотожо-влак.
Ме Л.М. Шамыкаевам уста туныктышо, «Ош пеледыш» ансамбльым 35 ий вуйлатыше семын сайын палена. Благовещенск педучилищым, вара Бирск пединститутым тунем пытарен. Шинчымаш аланыште ыштымыжлан тений 40 ий теме. Пашам тыршен ыштымыжлан «Отличник образования Республики Башкортостан» да «РФ Образованийын почетный пашаеҥже» лӱм-влакым сулен. Пытартыш жапыште районышто Общественной палатын председательже сомылым шукта, СВО тӱҥалме деч вара волонтер семын шуко тырша. Мер паша кугу чытышым да вий-куатым йодеш. Калык деч погымо окса дене салтак-влаклан гуманитарный полышым погымаште надырже пеш кугу. Чолгалыкым ончыктымыжлан «За заслуги перед Шаранским районом» нагрудный знак дене, «Патриот России», «Женщина - мать нации», «За помощь фронту», «За честь республики» медаль-влак дене палемдалтын.
Пайрем касыш юбилярым саламлаш родо-шочшыжо, коллегыже, йолташыже- влак шуко погынышт, тыланымаш мут шуко йоҥгыш, Шаран районысо ветеран- влакын председательышт М.Р. Саитоват толын ыле. Тудо юбилярлан Тауштымо серышым кучыктыш.
«Ош пеледыш» ансамбльын участникше-влак Людмила Мурзабаевнам гармонь сем почеш муралтен саламлышт.
«60 ий - эн сай, илышын шолын шогымо пагытше» - саламлыше-влакын тӱҥ ойышт тыгайрак ыле. Людмила Мурзабаевна деч ончыкыжымат у паша-влакым вучаш тӱҥалына, тидлан вий-куатше ситыше!
Новости партнеров