Оньавам дене кугешнем

Оньавам 1940 ий 8 мартыште Балтач районысо Актерыш ялеш шочын. Сар жапыште шочшо икшывын ачажым фронтыш наҥгаеныт, тушто тудо увер деч посна йомын. Сар годсо ий-влак пешат неле улмылан кӧра коваже-кочаже оньавамым шкешт деке илаш наҥгаеныт, ончен-куштеныт. Ош тӱня гыч кайымекышт, Рима Абдулмановна кокаже да павайже дене кушкын. Нуныштын мӱкшышт да мӱкшотарышт шуко лийын, эше колхозын мӱкшотарыштыже пашам ыштеныт. Ковам кокаж дене павайжылан тушто полышкален. Оньавам нунылан шочмо икшывышт гай лийын. 

1959 ий февральыште Рима Абдулмановна Казахстаныш каен. Тушто пасушто пашам ыштен, вара Магнитогорскышто чоҥышылан тыршен. Ик жап гыч тудо шочмо-кушмо вер-шӧрышкыжӧ, мӧҥгыжӧ, пӧртылын. 1961 ий октябрьыште Усолаш Миниахмет Галямшинович Галямшинлан марлан лектын. Коктынат фермыште пашам ыштеныт - тудо доярка лийын, пелашыже вольыкым ончен.  

Рима Абдулмановна вич икшывылан - кум ӱдырлан да кок эргылан - ош тӱням пӧлеклен. Кокымшо ӱдыржӧ шочмеке, тудо илалше аважым шке декыже илаш конден. Тудыжо оньавамлан икшывыже-влакым кушташ да суртысо, озанлыкысе сомылым шукташ полышкален. Чаманен каласаш логалеш, 1981 ий июньышто Рима Абдулмановна пелаш деч посна кодын: кӱтӱм кӱтымыж годым Миниахмет Галямшиновичым волгенче перен. 

Икшыве-влак да илалше аваж дене шкетын кодмеке, оньавамлан йоча-влакым йолӱмбак шогалташ куштылго лийын огыл. Но тудо виян ӱдырамаш - чыла нелылыкым сеҥен кертын. Тудо ушан-шотан икшыве-влакым ончен-куштен. Илен-толын, кандаш уныкан кова лийын, кызыт тудым кугезе уныка-влакат куандарат. 

Чаманен каласаш логалеш, эн изи эргыже - мыйын пелашем - ош тӱня дене пеш эр чеверласыш. Мый, изирак шешкыже, кок икшыве дене шкетын кодым. Оньавам мылам тунам тӱҥ эҥертышем лие, икшывем-влакым кушташ, йолӱмбак шогалташ полшыш. Авам колымеке, оньавам мылам кокымшо авам гаяк лие. Ме тудын дене моткоч кугешнена да уло чон дене йӧратена! Палемдыде ок лий, мыйын икшывем-влакат коваштым моткоч йӧратат, тудым мый да пелашем семынак изинек ныжылгын «авай» манын кушкыч… 

Тиде мотор шошо пайрем кечын ме Рима Абдулмановнам уло кумылын юбилейже дене саламлена! Тудлан пеҥгыде тазалыкым да, могай улеш, тугаяк кодаш тыланена!