Вачӱмбалныже - 70 ий

Роберт Васильев Кугу Келтей ялыште илыше шуко икшыван ешеш шочын. Ешыштыже ныл ӱдыр деч вара эрге шочмылан чылан куаненыт. 

Ачаже, Василий Васильевич Пашбеков, районышто палыме еҥ лийын, район вуйлык-влак кушко колтеныт, тушто агрономлан, туныктышылан, колхоз председательлан да моло вереат ыштен. Тыршен ыштымыжлан кок медаль дене палемденыт. Аваже, Александра Изибаевна Изибаева, ӱмыржӧ мучко икшыве-влакым туныктен, РСФСР просвещенийын отличникше, куд юбилейный медаль дене палемдалтын. Ты ешыште чап лӱмым сулышо кок акажымат палемден кодыман, шонем. Любовь Асанбаева - Башкортостан Республикысе здравоохраненийын сулло пашаеҥже, Людмила Пашуткина - Марий Эл Республикысе тӱвыран сулло пашаеҥже.

Роберт Келтей школ деч вара Кутерем школышто кыдалаш шинчымашым налын, Уфаште нефтехимик-влакын училищыштым тунем лектын. 1974 ий гыч нефть промышленностьышто электрохимзащита слесарьлан, контрольно-измерительный прибор-влак да автоматика шотышто слесарьлан, Арлан нефтепроводный управленийын лӱдыкшыдымылык техника да пашам аралыше, вара автоматика да телемеханика средства-влакым обслуживатлыме да ачалыме шотышто инженерлан ыштен. 2008 ий гыч «Калтаса» линейный производственно-диспетчерский станцийын автоматика средства-влак дене пайдаланыме участкыштыже контрольно-измерительный прибор-влак шотышто инженерлан ыштен.

Паша деч кӱрылтде, Саратовышто политехнический техникумым (1979), Москвасе кугыжаныш виш университетым тунем лектын. Мер пашаланат жапым муын. Индеш ий комсомол да профсоюз организаций-влакым, вара пакчазе-влакын товариществыштым вуйлатен, кок гана Кутерем участковый комиссийын председательжылан сайленыт. Кутерем селаште вер-шӧрым тӱзатымашкат кумылын ушнен. Пашам тыршен ыштымыжлан, чолга илыш позициян улмыжлан Р.В. Васильевын лӱмжым Арлан нефтепроводный управленийын Чап оҥашкыже пуртымо. Арлан нефтепроводный управленийын, Урал-Сибирь нефтепроводын управленийжын таумутышт, РФ Энергетика министерствын, УСН-ын профсоюз организацийжын, Калтаса район администрацийын Чап грамотышт дене палемденыт. Ӱмыр мучко нефть промышленностьышто тыршымыж дене «Почетный нефтяник» да «Паша ветеран» лӱм-влакым сулен.

Роберт Васильевич ден пелашыже, Раиса Асыляновна (Кутерем больницыште медсестралан, вара, сулен налме канышыш лекмешкыже, реабилитаций рӱдерыште ыштен), кум икшывым ончен куштеныт, нунылан сай образованийым пуэныт. Василий, Артем эргышт да Настя ӱдырышт ынде шкештат ешан улыт, коча-ковам уныка-влак куандарат.

Пенсийыш лекмек, Р.В. Васильев краеведений пашалан шӱмаҥын. «Мый документалист улам, документ-влаклан да илышыште лийше событийлам шке шинчашт дене ужшо еҥ-влакын мутыштлан гына ӱшанем», - ойла тудо. Келтейысе машина да трактор станций нерген материалым погымыж годымат районысо тӱрлӧ яллаште лийын, тудо жап нерген палыше ятыр еҥ дене вашлийын, республикысе архивыш миен коштын, библиотекыште улшо литературым шымлен. 2022 ийыште Калтаса типографийыште «Калтасинская машинно-тракторная станция Кельтей 1932-1962 гг.» книгам луктын, вара Уфаште эше 300 экземплярым савыктен.

Пагалыме Роберт Васильевич, тендам 70 ийым темыме юбилейда дене шокшын саламлена! Тек тиде кечын илышыштыда лийше чыла сайже гына: ӱшанле йолташ, йӧратыме еҥ, ушеш кодшо событий да вашлиймаш-влак - шарналтыт. Ме тыланда пеҥгыде тазалыкым, ончыко ӱшанлын ошкылаш, илышыштыда эше шуко сай татым тыланена.