Спортсмен, комсомол, активист

1944 ий 4 февральыште Келтей ялыште Юзбика Ильчигулован ӱдыржӧ шочын, тудым Ольга манын лӱмден. Сар деч ончычсо, туддеч варасе ий-влакат неле лийыныт. Ял калык фронтлан полшен, пеле шужен, нелылыкым чытен илен (Кочкышым налме картычкым 1947 ийыште пытареныт. - авт.). 

Юзбика фермыште пашам ыштен, шорык фермын пӧртыштыжак иленыт. Тудо ӱдыржым шкетынак ончен куштен. Изиш кугеммек, ӱдырат аважлан вольыкым кӱташ полшаш тӱҥалын. 

Школыш коштмо сылне пагыт гыч пионерыш, комсомол радамыш пурымаш, мер пашам шуктымаш кужашлан шарнаш кодыныт. Йоча пагытыште вольык почеш, воктенсе ялласе да райрӱдысӧ сабантуйышто куржталмаш яралан эртен огытыл, ончыкыжо ӱдырын спортсмен лийын кертмыже тунамак шижалтын.

1959 ий шыжым Уфасе «Строитель» стадионышто район верч таҥасымаште 100 метрыш куржмаште икымше верым налын. Телым Кутерем селаште ече дене районысо таҥасымаште 3 километр кужытышто эн кугу пӧлекым - «Пионерская правда» газетлан подпискым - сеҥен налын. Келтей шымияш школышто физкультур урокым тунам Матвей Шайдуллович Шайдуллин туныктен.

 Школым тунем лекмек, Ольга кеҥежым фермыште пашам ыштен. Шыжым Свердловск кундемыш каен, Лобво олаште пашам муын. 1962 ийыште Свердловск оласе ФЗО-што пекарь-тестоводлан тунемаш тӱҥалын. Тунем лекмек, кум ий Красноуфимск оласе кинде заводышто пашам ыштен. Тушеч комсомол путевка дене Запорожье оласе кинде заводыш колтеныт, кок ий тушто эртен. Спортышто чолгалыкым ончыктымылан, таҥасымашлаште ончыл верлам налмылан 1967-ше ийыште тудлан XVIII партсъезд лӱмеш каныме пӧртыш каяш путевкым пуэныт. Каныме годым Запорожский АЭС-ымат ужын толаш пӱрен улмаш.

Аваже черланымылан кӧра Ольга 1968 ийыште шочмо кундемыш пӧртылын. Ик пагыт библиотека вуйлатыше Р.Т. Сапаевам алмаштен, вара ялсоветыште счетовод-кассирлан, сберкассыште контролерлан, 1970 ий сентябрь гыч «Родина» колхозысо комсомол организацийын секретарьжылан, клуб вуйлатышылан ыштен. Тунам клуб Келтей эҥерым вончымо кӱвар воктен верланен, воктенжак кугу пазар лийын (кызытсе «Каламбур» кевытын олмыжо). 1969 ий декабрьыште клуб леведыш ден тувраш волен каеныт. Кеҥежым колхоз вий дене яра шинчыше ончычсо правлений ден ялсовет пӧрт шойылно у культура пӧртым чоҥаш пижыныт. Тудым нӧлтымаште Уфа ола гыч студент-влакын чоҥымо отрядышт чот тыршен. Пырдыж  нӧлташ кермыч ситен огыл. Ольга Ивановна (ме тудым тыге лӱмденна), рвезе-влакым поген, Келтей кермыч заводышто субботник-влакым эртара ыле. Ты завод тунам Келтей ден Кутыр кокласе пӱя воктен верланен, мастерлан Явай павай Шамаев ыштен. Колхозым Р.Х. Сарваров, ялсоветым У.И. Иликбаев вуйлатеныт. 

Культура пӧртым чоҥен пытарыме да пашаш колтымо сомылым Н.С. Ильчибаевалан виктараш ӱшаненыт. Ноябрь тӱҥалтышыште кӧргыштыжӧ ыштышаш паша-влакым мучашленыт. 1971 ий 7 ноябрь кастене Октябрь революцийлан 54 ий темме да у культура полатым почмо лӱмеш погынымашым эртареныт. Культура пӧрт вуйлатышылан Нина Семеновнам шогалтеныт.

1971 ий июньышто Ольга Ильчигуловнам ялсовет секретарьлан сайленыт. 1973 ий июль гыч тӱрлӧ вере пашам ыштен: сберкассыште контролер-кассир, культура пӧртыштӧ худрук да вуйлатыше, йочасад да почта вуйлатыше, повар лийын. Ты паша-влак коклаште колхоз фермыштат тыршен. Колхоз шаланыме деч вара вич ий социальный пашаеҥлан ыштен, тушечак сулен налме канышыш лектын. Тыге Ольга Ильчигуловна ял илыш дене кылдалтше ятыр пашам ышташ тунемын да нуным чоным пыштенак шуктен. 

Ольга Ильчигуловна ден пелашыже Роман Васильевич Ишимбаев Явай павайын сурт олмыштыжо пӧртым чоҥеныт. Кум ӱдырым ончен куштеныт, нуно шке ешышт дене посна илат. Коча ден ковам 8 уныка да 3 кугезе уныка куандарат.

Ольга Ильчигуловна, канаш лекмекат, чоныштыжо ончычсо гай «тулым» йомдарен огыл. Районысо ветеран организацийын, инвалид-влакын ушемыштын эртарыме ятыр спорт таҥасымаште участвоватлен. Тудын районысо, республикысе таҥасымашлаште кучыктымо кудло утла Чап грамотшо, медальже-влак, ветеран-влак коклаште эртарыме республикысе спорт фестивальыште икымше верлан кубокшо улыт, Инвалид-влакын всероссийский ушемыштын Башкортостанысе организацийжын таумутан серышыж дене палемденыт. Пытартыш жапыште шашке, шахмат дене модмаште, дартсым, баскетболым оҥгыш кышкымаште вийым терген. 

Ме спортсмен ветеранна дене кугешнена. Ольга Ильчигуловнам юбилейже дене шокшын саламлена да пеҥгыде тазалыкым, еш пиалым тыланена!