Шергакан авана, кована, лий эре пеленна!

21 ияш улмыж годым Пӱрӧ район Кужнур ялыш марлан толын. Ӱмыржӧ мучко верысе колхозын фермыштыже дояркылан пашам ыштен. Сай пашажлан шуко чап кагаз дене палемдалтын. Тыгодым шкетынак, манаш лиеш, куд икшывым йол ӱмбаке шогалтен, илыш корнышко луктын. Нуно кызыт тӱрлӧ кундемлаште илат, шкештат икшыван улыт, но йӧратыме аваштым огыт мондо - икшывышт (а кӧжӧ шкежат уныкан лийын) чӱчкыдынак шочмо мландыш толын каяш тыршат. Туге-туге, Зинаида Ильиничнан тачысе кечылан 9 уныкаже да 11 кугезе уныкаже уло. Кунамже нуно ава-кова-кугезе кова деке чыланат ик жапыште толаш тыршат. Тыгай годым куанже мочол! Икшывыже ден уныкаже-влак Зинаида Ильинична йыр чумырген шинчыт, ончыкышт фотоальбомым луктын пыштат... А тушто - курымашлык илыш: нелыжат-йӧсыжат, весела пагытшат-куанжат. Зинаида Ильиничналан икшывыже-влакын йоча годсо фотокартычкышт поснак шерге улыт. А уныка-влак, коваштын паша наградыже-влакым ужмеке, угыч-угыч йодышташ пижыт: тидыже могай суаплан? А весыже? Кумшыжо? 

Зинаида Ильиничнан ик кас мучко веле огыл каласкалаш ситыше шарнымашыже-влак улыт. Но тудо тачат утларакшым мутланен шинчылташ огыл, а пашам ышташ йӧрата. Кеч кызыт шкеже ынде чыла вере ок шу, но ожнысо семынак икшыве-уныка-влакшым сурт кокласе сомыллан эреак кумылаҥден, таратен шога: то пакчаште шӱкым кӱраш, то шудым солаш, удыраш, вӱтамбаке кӱзыктен опташ. Чын, вий-куат икмыняр начарештын, но, Юмылан тау, уш-акыл куат самырык годсыж гаяк яндар да волгыдо. А икшыве-влак тореш шомаклан тунемын огытыл: ава ойлен - тугеже ыштыман. Тыге кажне гана, икшыве-влакын суртышко чумыргымеке, ожнысо семынак чыланат пашалан рӱж  пижыт. А кастене паша деч вара... изишак нойышо... но монча шокшеш куштылемше, самбар йыр погынен шинчын, могай сай умыр касым пырля веселан эртараш! «Авай, ме тыйым пеш йӧратена, мом ойлет, чыла шукташ ямде улына, лач эре пырля гына лий», - маныт икшывыже-влак. А уныка-влаклан КОВА - кугу пагалымашым сулышо КУГУ айдеме!   

Таза лийза, Зинаида Ильинична, эше кужу жап икшывыда, уныкада, кугезе уныкада-влакым куандарен шогыза.