Максимын шонымашыже

Пайрем вашеш туныктышо тунемше-влаклан сочиненийым возаш темлыш. «Ӱдыр-рвезе-влак, вашке юзо пагыт шуэш. У ий пайремлан кажне йоча, лаштыкеш шонымашыжым возен, кож йымак пышта. Тендан могай шонымашда уло, возыза. Вес урокышто лудаш да лончылаш тӱҥалына», - каласыш. 

Коридор мучко йыҥгыр йӱк йоҥгалте. Йоча-влак Анна Ильиничнан урокыш рӱж куржын пурышт. Чылан шып гына парт коклаш пурен шинчыч, мӧҥгысӧ пашам лончылаш ямдылалтыт. Тунемше-влакын кумыл нӧлтшӧ гынат, туныктышын шӱлыкан улмыжым йоча-влак вигак шижыч. 

«Мӧҥгысӧ пашадам ончышым, чылалан отметкым шындышым. Молодец улыда, чылан сайын возенда, тыршымыда коеш. Но ик сочиненийым доска воктене лудаш йодам. Тиде Максимын шонымашыже. Максим, тетрадет дене лектын, класслан сочиненийым луд-ян», - каласыш да верышкыже шинче. 

«Йӱштӧ Кочай, - шыпак лудаш тӱҥале Максим. - Уло кумылын тый дечет йодам, шушаш ийыште кредалмаш пытыже. Калык, родо-шочшыж дене пырля куанен, У ий пайремым вашлийже. Тений мылам нимогай кампетке да модыш огыт кӱл. Лач иктым йодам: ачам У ий кастене омсашке тӱкалтыже ыле. Телефон дене кутырымына годым тудо мылам кугу кожым кондаш сӧрыш, эше шуко-шуко пӧлекым. У ий пайремлан пӧлек семын ачамым йодам манын нигунам шонен омыл. Ачаем! Уло кумылын толметым вучем. Тыйым чот йӧратем. Таза-эсен пӧртыл. Мый сайын тунемаш, авамлан сурт сомылым ышташ полшаш тӱҥалам. Сӧрвалем, тол вашкерак да эреак мемнан пелен лий. Тый мемнан геройна улат!»

Йоча-влак Максимын лудмыжым шып колышт шинчышт. Кенета Вика, рвезын шинчавӱдшым ужын, верже гыч кынелын, куржын миен ӧндале. Тидым ужын, моло йочат тарваныш…