Порсын кумылан ава да кувава

Наталья 7-ше классым тунем лекме деч вара фермыш шорык ончаш пурен, кочегарланат ыштен. Вуеш шумек, Кужнур ялыш Николайлан марлан лектын. Вич ий келшен илымек, пелашыже колен колтен. Ӱдырамаш Инна, Лира ӱдыржӧ-влак дене шкет кодын, эше Саша эргыж дене нелашан лийын. Тудлан Тынбайыш пӧртылаш верештын, икшывыже-влакым аваже кугемдаш полшен.

Наталья кокымшо гана Курмызак ялыш марлан лектын. Тушто 10 ий илен, туштак пенсийыш лектын. Вара Инна ӱдыржӧ Нерге ялыш илаш налын толын. Тудын Лира ӱдыржат тиде ялыш марлан толын. Саша эргыже ешыж дене шочмо ялыштыжак ила, аважым огеш мондо, эре толын коштеш.

Наталья акай чынак порсын кумылан ава да кувава улеш. Тудо мураш йӧрата, шуко такмакым пала, мыланемат книгалан такмак-влакым погаш полшыш, ик шагат коклаште 50 наре такмакым возыктыш. Ончыч йӱмаш-влак годым тудо кажне унажлан мурым лӱмлен пӧлекла ыле. Кидпашаланат уҥган, шӱртым шӱдырашат, пидашат пеш кертеш ыле.

Кызыт Наталья акай шоҥгемын, черлырак улеш, но ойласаш, ончычсым шарналташ йӧрата. Тудын 9 уныкаже да 13 кугезе уныкаже улыт, нуно эре унала толын шогат, коваштым куандарен кодат. Тудо чылаштымат йӧрата.

Наталья Сабиряновнам шочмо кечыж дене шокшын саламлена, пеҥгыде тазалыкым, кужу ӱмырым, шуко-шуко куаным тыланена.