«Шӱдӧ ий марте шоҥгемде «пеледмына» шуэш!»

Илалше-влакын кечыштым палемдыме годым кугурак ийготан ӱдырамаш-влакын клубышкышт ушан-шотан, илыш опытан, мудреч ӱдырамаш-влакым ӱжынна ыле, а лачшым гын Ӱлыл Качмаш школын ончычсо туныктышыжо-влак дене вашлиймашым эртарышна.

Т.А. Павлова марий йылмым да литературым туныктен, ятыр ий школ директорлан ыштен. Самырыкше годым тудым институт деч вара Марий Эл гыч тышке туныкташ колтеныт, да тышанак «вожаҥын», ешым поген, икшыве ден уныка-влакым куштен. Ӱлыл Качмаш гычак Сарваровмытын еш гыч ака-шӱжар Нина Аубакировна, Зоя Аубакировна коктынат шочмо ялысе школыштышт туныктышылан ышташ тӱҥалыныт, вара пӱрымашышт иктыжым Нефтекамск, весыжым Агидель олалаш колтен. Сулен налме канышыш лекмек, уэш шке ялышкышт пӧртылыныт.

Вашлиймаш усталык шӱлыш дене эртыш: мурымат мурышна, модыш-влакымат шарналтышна, йӧратыме почеламутымат лудна. «Гурман» кафен озаже Ринат Хайдаровын пайрем уна-влаклан муралтымыже чылалан келшыш, а Зухра пелашыже тутло чес дене сийлыш.

Идалык мучко шуко пайрем эрта. Но тиде поснак ойыртемалтше - ийготым ончыде, чон дене самырык кодшо-влаклан. Тек илышыште тыгай пайрем шукырак лиеш!