Ятыр савыртышан историй

Эмлалтме жап эртымек, мыйым выписатлышт, а мӧҥгӧ чиен каяш йолчиемем уке… Врачлан ойлышымат, тудо диспансер пелен ыштыше юрист дек пураш темлыш. Юрист кӱлеш документ-влакым оформитлыш, анкетын бланкшым пуыш да чыла шке возаш шӱдыш, Кировский РОВД начальник лӱм дене заявленийым серыктыш… 

Эмлалтме диспансер гыч пуымо шӱкшӧ, ече гай кужу тапычкым йолешем чиен, юристын оформитлен пуымо кагаз-влак дене Кировский РОВД-н дежурный часть окнашкыже миен пералтышым, «Кузе лияш, ом пале. Талиповын налын кайыме туфльым пӧртылташ полшыза» маньым. Шӱтен ончышо шем шинчан, явык шӱргывылышан, Максим Горькийын произведенийже гыч Челкаш гай койшо капитан, мыйын кид гыч кагаз-влакым налын, пеш тӱткын ончен лекте да мыйым тӱрлӧ мут дене мыскылаш тӱҥале: «Гмм… Марий улат да? Школ директор! Гуляен коштын, шакше черым муынат… Тылзе мучко кугыжаныш кӱшеш эмлалтынат! А ынде мый тылат йолчиемым кычалшаш улам! Пшик тышеч!»

Мыланем тудын мыскылымыжым колышташ пеш неле лие… «Пшик» манын, ӱмбакем шолымо кагаз-влакым погышымат, «Мый тендам умылышым! Таче тыгай кече, тынар жап (шагатышкем ончальым). Ты жапыште кӧ дежуритлыме журналыште возалтын дыр» манын, омса велыш ошкыльым… Капитан умбакыже тиде сомыл кузе вияҥшашым вигак умылыш, коеш! Почешем уремыш лекте, чарнаш сӧрвалаш тӱҥале, «Те, гражданин, ӧпкелышда мо? Мый вет мыскарам гына ыштышым, пурыза, мутланена» манеш.  А мый тудлан «Сита, поезд каен, вараш кодында!» манын вашештышым. 

Саде шӱкшӧ тапычкым кудашдеак, трамвай дене «Советская Башкирия» газет редакцийыш миен шуым. Омсаште дежуритлыше вахтер мыйым ыш пурто, но «Серыш пӧлкаш логалде омак кае» манмемлан пропускым пуашыже вереште. Пӧлка вуйлатышын пӧлемышкыже пурен, возен ямдылыме вуйшиймашем пуышым. Пӧлем оза тӱткын лудын лектат, каласыш: «Вуйшиймашдам огына савыкте, Кировский РОВД вуйлатышылан колтена. Тудо мерым приниматла да тыланда почта дене вашмутым колта…» 

Мый мӧҥгӧ пӧртыл кайышым. Ик арня гыч мыланем Уфа гыч серыш толын шуо. Тушто тыге возалтын ыле: «Пагалыме Яметов йолташ, Кировский РОВД вуйлатыше-влак полшаш йодын толмыда годым дежурный частьын дежурныйжо милиций капитан Гиззатуллинын шкенжым шотдымын кучымыжлан извиненийым йодыт. Вуйшиймаш-йодмашдам Кировский РОВД-н виш партийный собранийыштыже лончылышна. Гиззатуллиным капитан гыч кугурак лейтенантыш «волтышна», дежурный часть гыч кораҥдышна, участковый инспекторлан ышташ тӱҥалеш. Гражданин Талипов туфльыдам почта дене тендан адрес дене колтен (посылка номерым да колтымо кечым ончыктымо)». 

Кок кече гыч посылкат толын шуо. Яшлыкым почым гын, ялтак ӧрым: туфлем-влак йолеш чийышаш гаят огытыл, ялтак тӱганеныт, таганышт асфальтеш нӱжалтын! Мый тудо туфльым паржыге саде посылка яшлыкышкак кудалтышым да запискым возен пыштышым: «Мыйын туфлем тыгай огыл, у ыле!» Кировский РОВД-ш почта дене колтышым. Кок арня гыч мыланем вес посылка толын шуо, тушко мыйын гаяк моделян у туфльо пышталтын ыле. 

Тыге тиде конфликтыштат адакат мый, изи гына марий, сеҥышым шол! Кок арня гыч Кировский РОВД гыч следователь ӱдырамаш дене вашлияш вереште. Тудо «Капитан Гиззатуллин тачат «Тыгай осал самырык марий дене вашлиям манын, ик ганат шонен омыл ыле» манын ӧкына» мане. Пашажымат кудалтен, вес верыш куснен. Кызыт ила але уке, ом пале. Кужу ӱмыран лийже манын тыланем.