Все новости
Илыш пасу
12 теле 2022, 10:00

Сар гыч пӧртылшӧ каче-влак

Ик теле кечын Апкалек ден Васлий  имне дене Умарий ялыш каяш лектыч.   Сагида кокашт унала ӱжын, ӱдырым мумыжо нерген шижтарен. Каче-влак, рвезынек сарыш кайымеке, ӱдырым налын шуктен огытыл. Нуно Сагида кокаштын тукымжо гыч улыт. Тудо Козаш гыч Умарийыш  марлан миен.   Кок качымарий терыште мутланен каят.

Photo by Cornelia Munteanu on Unsplash
Photo by Cornelia Munteanu on Unsplash

- Жапыштыже ӱдырым налаш ыш лий, сар мешайыш. Иктаж ӱдыржӧ келша гын, налынак пӧртылам, - ойла Апкалек.

- Кушко тунар вашкет вара? - йодеш Васлий.

- Мый тый дечет изиш кугурак улам.

- Йӧра, Сагида кокай яралан ӱжын огыл дыр, - пелешта Васлий.

Тер корно дене вик каяш гын, Мишканыш пурыде, Умарийыш кечываллан миен шуаш лиеш. Нуно  кечывал деч вара миен шуыч. Имньым пешак ышт покто. Сагида кокашт  шочшыжо-влакым куанен вашлие. 

Каслан нуным  ӱдыр ден эрге-влакын модмашке ужатыш. Мӱндыр каче-влакым клубышто порын вашлийыч.  Васлий пеленже музиканым конден. Тудым шокташ йодыч. Каче ыш ялындаре, мотор сем-влакым шокташ тӱҥале. Чылан куштат, мурат, а  музиканче  ӱдыр-влакым эскера. Ик ӱдыржӧ тудлан моткочак келшыш. Ужеш, Апкалекат ӱдырым муын, воктечше огешат кай. Шем шинчан мотор ӱдыр Козаш качым  шкеж деке савырен. «Мыйын чӱчӱньӧ мотор лиеш», - шоналтыш Васлий. Тудо музиканым шоктымыжым чарнышат, уремыш шӱлалташ ошкыльо. Ӱдыр-влак почешыже лектыч.  Каче нунын деч ӱдыр нерген йодышто, лӱмжым палышат, куанен колтыш. Музикан йӱк шергылте, Васлий содор  клубыш пурыш, шинчаж дене  ӱдырым кычал муо, сем почеш кушташ лекте. Пайсуло деч кас мучко ыш кораҥ.  Но ужатен ыш керт, ӱдыр кенета уке лие. 

Эрлашыжым  кумытын ялыш пӧртыльыч. Апкалек, сар гыч пӧртылшӧ салтак, кугу  сӱаным ыштыш. Сар деч вара Козашыште тиде икымше  сӱан лие. Васлият ӱдырым налаш погынаш тӱҥале. Ончыч  сар гыч ачажым вучышт, но ачаже ыш пӧртыл. Ялыште  ужатыме  ӱдыржӧ уло, но ала-молан Умарий гыч кондаш лие. Каче эре Пайсуло нерген шона, тудымак марлан налнеже. 

Шошо велеш, ик  мотор кечын  Васлий, Апкалек, Окалче Умарийыш ӱдыр налаш каят. Кастене Пайсулым туларташ мият. Сар гыч сусырген  толшо ачаже  ӱдыржым мӱндыркӧ марлан пуаш ок келше. Тунам Апкалекын ватыже Васлийлан ӱдырым ончыкташ Яндалче пошкудыж деке пурта. Качым ӱдырлан мокташ тӱҥалеш:

- Яндалче, мотор каче тыйым налаш толын. Тудо музиканче, счетовод лийын пашам ышта,  тыматле. Пошкудем, пырля кушна, тудлан марлан миет гын, ик ялыште илаш тӱҥалына.

Яндалче клубышто шоктышо музиканчым  палыш, реза лие. Тыге Васлият ӱдырым нале. Но каче ӱмыржӧ мучко Пайсулым ыш мондо.  А Яндалчын Метрий лӱман качыже армиеш кодо. Тудат эре Яндалчым шарнен илыш. Яндалчын ӱдыржӧ кажне кеҥежым  куваваж деке унала толын. Метрий, колхозысо бригадир, изи ӱдырым ужашак тыршен, тудым моткочак аважлан ушатен. Метрий Умарий воктенсе  Шабан ялыште ила, ӱдырым налеш, лу йочам ончен кушта.

Сар гыч толшо каче-влак пелашым муыч. А мыняр ӱдыр сар гыч таҥжым вучен ыш шукто! Мыняр самырык вате-влак марийыштым омышто гына ужыч. Йоча-влак пеле тулык кушкыч. Сар нигӧланат ок кӱл. Нигунамат ынже лий!

Photo by Cornelia Munteanu on Unsplash

Автор:Д. АПЛЕКАЕВА. Караидель район.
Читайте нас: