Икшыве ден уныка-влаклан куанен ила

Аванан илыш-корныжо куштылго лийын огыл. «Вич ияшем годым ачам Кугу Ачамланде сарыш кайыш. Война гыч ыш пӧртыл, - шарналта авам. - Вара 17 ияш Йыван чӱчӱмым элым аралаш наҥгайышт, тудат ыш пӧртыл. Тудо ийлаштак Петрай кочам колыш. Кочкаш, чияш уке ыле. Вургем укелан кӧра 10 ияш школыш тунемаш кайышым. 12 ияшем годым авам (Айгалче) дене коктын пошкудо Армяниново руш ялыште (кызыт тиде ял пытен) сорла дене уржам тӱредна. Авам тӱредеш, мый полшем. Канаш шичме годым мый мӧрым погем, вара олыкыштак кӧршӧкеш уржа ден мӧрым пыштен шолтем ыле. Тыге мӱшкырым теменна. Мӧрым шукырак погымем годым авам тудым руш ялыште шӧрлан, тувыртышлан, киндылан алмаштен.

Мыняр кече тыршымынам ом шарне, но чылаже 5 гектарым тӱредмылан шуко киндым пуышт. А вес ийжылан Каҥгыл ял пасуш тӱредаш коштна.

Амчемучаш школышто шым классым тунем пытарымек, фермыште дояркылан ышташ тӱҥальым.19 ияш марлан каен, кум икшывым шочыктышым.

Пенсийыш лекмеш, дояркыланак ыштышым. Колхозлан шудо солашат шуко полшышым, идымыштат ышташ логалын. Чап грамотем-влакат улыт. 

1986 ийыште колхозысо ончыл пашаеҥ-влакым Москваш экскурсий дене намийышт. Мыят Йошкар площадьым, Ленинын мавзолейжым ужын тольым.

Ала илалтын, ала уке, ӱмыр эртенат кайыш. Ӱдыр-влак марлан лектыч, уныка-влак шочыч. Нуным ончен, вучен, куанен илем».