Крымсарай ялын шочшыжо Виталий Калиевлан службым Архангельск оласе Плесецк космодромышто эрташ логалын. Шочмо элым аралаш кайыше марий рвезылан тӱҥалтыште оҥай чучын, кугу ракета воктене шкенжым лӱддымӧ космонавтла шижын. Но варарак стратегический назначениян войскан пеш серьезный улмыжым умылаш логалын. Кок ий жапыште «Тополь-М» ракетылан виян оружий семын испытанийым эртараш тунем шуын. Службын кокымшо ийжылан тудлан отделенийын командирже лияш ӱшаненыт.
«...Тыгай ракетым тыныс илышыште нигунам кучылташ ынже логал!» - ойла В. Калиев. Тачат Ачамландым аралышын кечыжым тыгай кумыл да тыланымаш дене вашлиеш. А икмыняр ий гыч тудын эргыжланат салтак корным тошкыман - ачаж гаяк Шочмо элым, мемнан тыныс илышнам аралаш ямде лийман.