Пел курым утла гыч вашлиймаш

Школыш коштмо жап нигунам огеш мондалт. Тунам, кажне кечын тунемаш коштмо, тӱрлӧ кружок да ешартыш занятийлаште эре пырля лийме годым, чонлан нимогаят чучын огыл. А школым тунем лектын кайыме деч вара чон икте-весым кычалеш, ужмо шуэш…

Ме 55 ий ончыч Мишкан кыдалаш школым тунем пытарышна, йӧратыме туныктышына-влак дене чеверласышна. Таче чылан гаяк кова-коча, кугезе кова-коча лийынна. Пырля тунемме йолташ-влак дене тений май мучаште вашлияш кутырен келшышна. Чылаже луын погынен кертна, эртыше жапнам шарналтен шинчышна.

1963 ийыште Мишканысе кыдалаш школын индешымше классышкыже 103 тунемше толын, садлан чылаже 3 класс лийын. Ме 9«б» классыште кумло кумытын тунемаш тӱҥална, чылаже 15 ял да Бирск районысо Угузево, Реве, Памаш гычат ӱдыр-рвезе-влак коштыныт. Мишканысе кандашияш школ деч вара мый, Татьяна Изиланова, Елизавета Владимирова, Елена Сайпушева, Борис Русинов, Анатолий Янбахтин, Николай Мурзабаев, Николай Шамиданов парт коклаш шинчынна.

Школышто шинчымашым пуымо деч посна могай-гынат профессийын специальностьшыланат туныктеныт. Мемнам кум ий жапыште старший пионервожатый семын туныктен луктыч, а вес кок классыште механизатор-влакым ямдыленыт. Но кыдалаш школым тунем лекме марте кок класс гына кодо, кӧлан тунемаш неле лийын - кудалтен каен. Тора ялла гыч тунемше-влак йоча пӧрт гыч ыштыме итернатыште иленыт.

Старший пионервожатый-влакым ямдылымаште Пионер пӧртын директоржо П.С. Паляев чот тыршен, пионер, комсомол паша дене пырля фотомат ышташ туныктен. Пионер пӧрт пеленсе струнный инструмент дене шоктымо кружокыш коштынна. Педпрактикым эрташ Уфашке ик арнялан намиен. Оласе школлаште тӱрлӧ мероприятий-влакым онченна. Педпрактикым тыгак «Инчур» пионерлагерьыште старший пионервожатый семын эртенна. Тыге 11 класс деч вара 19 еҥнам районысо школлаш пионервожатыйлан пашам ышташ колтеныт. П.С. Саляев ош тӱня дене чеверласен гынат, ме тудым шарнен да тауштен илена.

11«а» классым 24 тунемше пытарен, аттестат дене пырля нуно трактористын праважым налыныт. Класс вуйлатышышт А.Н Самойлова ыле, но тудо мемнан верчынат тургыжланен. Школ директор М.П.Петров, туныктышына-влак Р.А. Петрова, Л.Б. Сайранова, А.З. Дашкина, З.И. Кидалашева, И.Ш. Шуматов, Н.М. Кашапов, Н.Г. Гайнанов, Е.М. Лобастова, В.М. Михайлов мемнан чоныштына кызытат илат.

Тыге ме туныктышына, тыгак илыш дене чеверласыше йолташна-влакым шарналтен, «Три апельсина» кафеште шинчышна, кажнына школ деч варасе илыш корнына каласкалышна. Йодыш почеш вашмутан оҥай модыш-влакым эртарышна, почеламут, такмак-влакат ӧрдыжеш ышт код, школ годсо фото-влакым уэш шымлен ончышна, «Школьные годы чудесные» мурым муралтышна…

Тунем лекмыланна 60 ий темме юбилей марте ынде кажне ийын вашлияш кутырен келшышна. Ий-влак эртат, ме шоҥгемына, ӱпна чалемын, йӱкна молемын, шӱргына куптырген. Но садак рвезе жап ушеш возеш, кеч-мом манат гынат. Витле вич ий ожно тунамсе кыдалаш школышто кок классым тунем лекше-влак ынде ме икте-весынам родо-шочшо гай ужына.

Кече лектеш эрден ай,

ший гае,

Волен кая кастене той гае.

Мемна ӱмыр порсын гае

Эртен кая йогын вӱд гае.

Автор:М. ГАРЕЕВА-ИБАЕВА. Нерге ял, Мишкан район.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».