Якте шӱдыр гай волгалтара

Кече шыман шыргыжал онча. Теве 9 май, Сеҥымаш кечат, шеҥгелан кодо. Йоча годсо гаяк, тиде кечым чон вургыж вученна. Жап эртыме семын умылена, тачысе кечылан воктенна Кугу Ачамланде тул лоҥгаште лийше ветеран-влак веле огыл, «сарын йочаже» манме тукымат шагалем толеш. Таче элнан йӧсӧ жапыштыже шочшо, неле пагытыште кушшо-влак кокла гыч иктыже, З.И. Миколкина нерген, поро ойым каласынем.

…1985 ийыште кыдалаш школым тунем пытарыме деч вара Йошкар-Олаш тунемаш пураш каенна. Тушто мемнан Калтаса район Павасола ялнан шочшыжо Миколкин Степан павайын ватыже Зина кокай дене верланенна. Паленна, тудо марийже ден кум ий наре веле илен шуктен да изи Эля ӱдыржӧ дене коктын гына кодыныт.

Зинаида Ильинична шкеже пошкудо Киебак ялеш сар годым, 1943 ийыште, шочын. Ачаже, Илья Тимирбаевич Тимирбаев, агроном-влакым ямдылыме курсышто туныктен. Шуко жап Ильич лӱмеш колхозышто тыршен, Пошкырт кундемын заслуженный агрономжо лийын. Тудо шке жапыштыже ӱдыржым, кӱшыл шинчымашым пуаш шонен, Йошкар-Олаш туныктышылан тунемаш колтен. Крупская лӱмеш Марий кугыжаныш пединститутым тунем пытарыме деч вара Зинаида Ильинична Шойбулак школышто, вара Семеновкысо школ-интернатыште тыршен. Пелашыж деч посна кодмек, уло кумылжым, чонжым, йӧратымашыжым ик падыраш ӱдыржылан пӧлеклен.

Кокайнан чонжо моткоч поро ыле. Мемнам шке икшывыж семын пагален вашлийын, сийлен. Чыланнам лишыл шочшо семын ужын. Ме кокайнам моткоч йӧратенна да пагаленна. Вич ий Йошкар-Олаште тунемме жапыште Зинаида Ильинична мыланна кокымшо аваш савырнен. А вет мемнан деч посна тудо эше шуко шочшыжым, шочшыжын шочшыжым шке пачерыштыже кумылын вашлийын, ончен, пукшен-йӱктен. Тудын нерген Павасола гыч Валерий Изиметов шольыжат, Савакмарий гыч Тоня Исинбаева шӱжаржат таум ыштен шарнат. Могай кӧргӧ виян, поро деч поро кумылан лийын тиде марий ӱдырамаш! А кушеч вара вийым муын? Вет шкет ӱдырамашлан пӧръеҥ олмешат чыла ышташ-муаш верештын. Ӱдыржын чыла лийже манын, школ деч вара эше вес пашаште тыршен. Йӧсӧ, неле деч чонжо осалыш, торжаш савырнен огыл. Тудо нигӧм аламаш луктынат, вурседалынат огыл. Поро айдемын йолташыжат шуко лийын. Кажне ийын коллегыже-шамыч икымше мартыште шочмо кечыж дене саламленыт. Школ-интернат гыч глухонемой йоча-шамычшат поро туныктышын суртыш шочмо икшыве гай толын коштыныт да иленыт.

Зинаида Ильинична - Ӱдырамаш, Ава да Туныктышо. Тудо 40 ий утла школышто ыштен. Сулло пашажым пагален, З.И. Миколкиналан «Марий АССР-ын заслуженный туныктышыжо» да «Педагогика пашан ветеранже» лӱмым пуымо…

Угыч кеҥеж толын тӱнямбаке. Тудо мландынам сылне тӱс дене сӧрастара. Но шергакан шочшына пеленна уке. Оласе шӱлыкан пачерыштыже ӱдыржӧ, уныкаже да ме, шочшыжо-влак, чонна дене тудым кычалына. Чапле айдеме ончылно вуйнам савена. Тудын поро илышыже, кавасе якте шӱдыр гай, мемнан шарнымаште, чонышто волгалташ тӱҥалеш.

Автор:Э. ТАМИЕВА-ШАЙМАРДАНОВА. Калмиямучаш ял, Калтаса район.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».