+6 °С
Пылан
Все новости
Илыш пасу
14 Пургыж 2021, 16:35
Медальон
Билетыште ончыктымо вагоным да верым муын, Москош кудалше поездеш верланышым. Купеште илалше ӱдырамаш дене коктын веле улына. Палыме лийна. Поезд тарванымек, корнылан ямдылыме кочкышым сумка гыч луктымат, Танямат чайым пырля подылаш ӱжым. Окнаште вашталтше сӱретым ончен, шокшо чайым подылын, мут мундыранам рончаш тӱҥална.
Икмарда капан, кокла ийготан, ушан да поро шинчан Таня туныктышо улмаш. Шкеж дек ала-кузе кумылым савырен, ойлымыжым колыштыктен мошта. Шинчамлан шӱйыштыжӧ кечыше медальон перныш. Уке, тудо шӧртньӧ огыл, ак денат шерге манаш ок лий, пешак огешат йылгыж, мӧҥгешла, изиш шапалгашат тӱҥалын. «Чонжылан лишыл пӧлек, очыни», - шоналтышым. Медальонын формыжат оҥай - ромбик. Шинчаончалтышемым шижын, Таня, шинчыр гыч мучыштарен, медальоным почо. Кӧргыштыжӧ изи фотом ончыктен каласыш: «Тиде мылам еш пиалым пӧлеклыше пелашем. Ӱмыржӧ гына кӱчык лие. Поро, тыматле, пашаче, ӱшанле пӧръеҥ ыле. Ӱдыр ден эргына йол ӱмбак шогальыч, шке ешышт дене илат. А тидыже, - фотографийым пинцет дене луктын, савырен ончыктыш, - рвезе годсо икымше йӧратымашем - Коля, Николай». Мый ӧрым. Ваш пижыктен шындыме - ик велныже пелаш, вес велныже икымше йӧратымаш - фото-влакым чӱчкыдын ужында мо? «Медальонжымат тудак пӧлеклен. Астраханьыш арбузым погаш мийымышт годым налын толын ыле, - мутшым шуйыш Таня. - Молан икте-весышт деке пижыктен шынденам? Илышем нунын дене кылдалтын, чоныштем кажныже шке вержым налын. Но ончыл велне - илышыштемат, медальоныштат - эре Саша, пелашем. А Коля? Ик могырым, тиде илышыштем поро, мондалтдыме, рвезылыкем дене кылдалтше шарнымаш, вес велым… Ойго манам гын, чын ок лий: куанже шукырак лийын. Йӧратымашыже мыйым пиаланым ыштен. Кеҥежымсе турий семын чонем пиал дене темын, чоҥештылын. Эре тыге лиеш, шоненам. Но пиал эре помышышто илен ок керт. Кунам гынат але киен кодеш, але чоҥешта. Пиалын почшо кӱчык: чот кучыман, аралыман. Йӧратыше айдемым пиал соҥыраш да сокырыш савыра - нимогай удам ужмыжат, колмыжат ок шу. Колюшем мый дечем посна эше иктаж-кӧ дене вашлийын кертеш манын шонашат тоштын омыл. Мый тудын икте гына, тудат мыйын икте лийшаш. Ала кумда да поян чонан лийын, ала йӧратымаш тулжо виян улмаш, ала эше иктаж вес амал дене тудо вигак кок ӱдыр дене кылым кучен улмаш. Мыйым кече гай волгалтарыше, кумылаҥдыше, ырыктыше Коля вигак весе деке куржеш манын, кӧ шонен?!
…Ик кечын таҥем пӧлемыштем шинчымыж годым студенческий билетемым шижде кӱсенышкыже пыштен да монден налын каен. Тудым ужатымек, билетемым кычалаш тӱҥальым. Чыла вере ончышым, но арам. Колюшем наҥгаен ала, шонен, илыме пӧлемышкыже вашкышым. Омса дек лишеммек, тӱкалташ шонен, кидем нӧлтальым. Кенета омса вес вел гыч ӱдырын куан йӱкшым кольым. Тӱкалташ манын нӧлталме кидем южышто сакалте. Адак кӧгӧрченла весела йӱк шоктыш. Чонем ӱлык волен кайыш. Кидем, вияҥын, омсам пералтыш. Омса почылто. А тушто… Коля ӱлыл вургем дене шога. Мый пӧлемыш шым пуро, шымат шурго, нимом шым йод. «Студенческий билетемым эрла пӧртылтӧ», - пытартыш вием дене пелештышымат, савырнен, ушым йомдарышыла ошкыльым. Тиде татыште мом шижынам? Пушкыдын каласымаште, сайжак огыл. Йолташ ӱдырем-влак, умылыде, ӧрын йодыштыныт, лыпландареныт. Эрлашыжым Коля билетемым пӧртылтен, мыйым гына йӧратымыже нерген товатлен ойлен. Но тиде тунам адак ик шоя лиеш ыле. Вараракат вашлийын мутланаш тыршен, проститлаш йодын. Но пел ий гыч Колюшемын вес таҥже нелашаҥе, да нуно сӱан деч посна ушнышт.
Йӧратен мо тудо мыйым? Йӧратен докан. Коля, вес курс гыч лийын гынат, кажне ийын гаяк пырля тунемме йолташ-влак дене вашлиймашке миен. Мыйым йодыштмыж нерген ойленыт. Мый веле тӱрлӧ амал дене мийыде кодынам. Икшывем-влак кушкын шумеке веле мияш тоштынам. А Николай? Колюш ту жаплан уке ыле. Нелын черланен, ош тӱня дене чеверласен. Медальонжо пеленем кодо. Тудым ондак шондык пундашке кудалтенам. Вара пелашем дене когыньыштын фотоштым оҥ пеленем кондыштараш тӱҥальым. Чоныштем нимогай кочым, ӧпкем ом кучо. Ушешем волгыдо, поро шарнымаш веле кодын. Пӱрымашна тугай лийын, очыни. Илыш книга огыл: лаштыкшым кушкед шолаш але, пужен, вес семын возаш ок лий. Пелашемланат ик ӧпке мутемат уке. Пагаленам тудым, чот пагаленам. Саша, кӱлеш гын, ешыж верч тӱням савыраш ямде ыле да тыгак ыштен. Пелашыже семын мый нигунам нимогай чӱдылыкым шижын омыл», - иктешлыш Таня.
…Илыш йӧратымаш дене гына виян огыл. Чын, йӧратымаш илышым ончыко наҥгая, но еш илышыште эн ондак икте-весым пагалымаш, чаманымаш, аралымаш шерге улыт.
Читайте нас:
© 2024 «Чолман». Республиканская общественно-политическая газета на марийском языке. Издается с 24 апреля 1991 г.
Главный редактор - Губаев Игорь Иванович.
При использовании материалов гиперссылка на сайт cholman.info обязательна.
Категория информационной продукции 12+
Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.
Мы в соцсетях:
ВКонтакте - vk.com/cholman
Telegram - https://t.me/cholmantv
Я.Дзен - https://dzen.ru/cholman
ОК - ok.ru/cholmanrb
TikTok - tiktok.com/@cholman.tv
Телефон
Телефон: 8(34783)7-07-97.
Электрон почто
Адрес
Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж.
Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».