Шуко поро мутым ойлыман ыле...

29 ноябрь - Аван кечыже Тиде фотошто пурла вел гыч икымше мыйын авам - Венера Кочубеевна Яманаева. Йӧратыме марий тувыржым чиен, йолташыже-влак воктен йылмаен шога. Тудо кастен нуно Пураял клубышто выступатленыт, мотор марий муро-влакым муреныт…

Но кок кече гыч авам ош тӱня дене чеверласыш… Ындыжым кузе туге лиймым шонымат ок шу. Тудо эрдене шӱжаремлан йыҥгыртеныт: «Тыйын аватым Пураял остановка воктен машина перен кайыш!» Корныш куржын лекмекыже, корно покшелне шинчыше авайым ужын. «Мый шке шуҥгалтым, мый шке шуҥгалтым», - пачаш-пачаш ойлен тудо. «Вашкеполыш» машина аванам Коян больницыш реанимацийыш наҥгаен. Инсульт диагнозым шынденыт. Но кастене тудо комыш пурен каен. Эрлашыжым Нефтекамск больницыште вуйжылан операцийым ыштеныт.

«Операций сайын эрта гынат, авада ончычсо гай ок лий», - вигак каласыш нейрохирург. Но тыйын лишыл еҥетым колымаш деч ик ӱп пырче гына ойыра гынат, тый чыла ышташ келшет. Меат операций эртымым куд шагат больница коридорышто вучен шинчышна. Варажым медсестра лектын каласыш: «Операций сайын эртыш, ынде вучаш гына кодеш, йӱдым лектеш гын - ила. Тыште шинчен, нимо дене полшен огыда керт, мӧҥгыда пӧртылза».

Пачерыш кайышна, но чыла шонымашна авай нерген лийын - паремже, тӧрланыже гына ыле манын тыланенна. Марла, рушла, татарла удылынна. Но йӱдым больница гыч йыҥгыртен каласышт - авана ош тӱням коден каен… Тыге тудын ӱмыржӧ лугыч лие. Тений 7 ноябрьыште шӱмжӧ кырымым чарнымылан вич ий эртыш. Чылажат Юмын кидыште! Машина дене перен кайыше айдемат, Коян больницысе врачат шке корныштым тошкат…

Авана эре еҥлан полшаш тырша ыле. Тудо шучко кечынат олашке коштын кертдыме инвалид йолташ ӱдырамашлан пачерым ончаш каен.

Пеш йӧсӧ, кунам шымле ийым гына темыше, мурен-куштен коштшо еҥ илыш дене кенета чеверласа. Авана ӱмыр мучко туныктышылан ыштен. Паша корныжым 1970 ийыште Пӱрнӱш школышто тӱҥалын, 1972 ий гыч сулен налме каныш марте Пураял школышто математикым туныктен.

Ӱмырыштыжӧ шуко йӧсым чытен. Марийже, Фёдор Шакиртович, 1993 ий июльышто нелын черланен кийыме деч вара колен. Тыге 48 ияш тулыкеш кодын, но чыла йӧсылыкым сеҥен. Кок кугу ӱдыржӧ йол ӱмбак шогалше лийыныт гынат, вес кок изирак ӱдырым кугемдаш кӱлын.

Ныл ӱдыр чыланат вузым тунем пытаренна. Коктын тудын корныж дене каена - туныктышылан ыштена. Мыйым чыла еҥат аватлан ушагенат, йӱкетат, ошкылметат тудын гай, маныт. Мый тидлан йывыртем гына. Ынде шкежат ава гына огыл, кувава улам. Авамын ныл ӱдыржӧ, ныл уныкаже да ик кугезе уныкаже улыт. Ӱшанем, тудо чыланнам кӱшыч «йывыртен онча». Чонем кызытат авайым кычалеш… Палем, тудо узьмакыште. Эх, аваем! Тыланет шуко поро мутым ойлымына шуэш! Кийыме мландет мамык гай пушкыдо лийже!

Молан дыр айдеме тыгай улеш. Лишыл еҥна пеленна годым поро, ныжыл мутым ойлаш ала вожылына, ала она тошт. Самырык-влаклан каласынем: йӧратыза, чаманыза авадам! Ида чамане ныжыл мутым, поро шомакым! Вет аван шӱмжӧ йочаж пелен! Мыняр ават шоҥгемеш, тунар чотрак йӧраташ, тунар чотрак чаманаш кӱлеш! Аван чонжылан ик поро мутат сита. Авадам ида мондо, пашада шуко, жапда уке гынат, кеч телефон дене мутланен налаш йӧным муза!

Читайте нас:

Новости партнеров

Был стипендия кемдәргә түләнә?

На уровне молекул

Азык-төлеккә талон системасы кертелергә мөмкин

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».