Тыныс илыш икте-весым пагалымаш, умылымаш гыч тӱҥалеш

Йолташем мыйын гаяк лиеш гын, мый тудын дене ом келше ыле. Адакшым пӱртӱсыштат тыгай икгайлык уке. Молан ом келше ыле, маныда? А мо оҥайже? Чыла, мо мый денем уло, тудын денат тидак, нимогай ойыртем уке. А чон, уш-акыл мом-гынат уым кычалеш, оҥайым йодеш. Садлан айдеме йолташлан вес тӱрлӧ еҥым, кудыжын илышыже, шонымашыже, уш-акылже тудын деч кеч изишлан ойыртемалтеш, ойырен налеш. Айдемын тӱрлӧ лиймыжлан ӧршаш уке. Вес семынже, тӱня - тиде кеҥежым пелед шинчыше тӱрлӧ сынан да пушан волгыдо олык. А олыкын моторлыкшо - тӱрлӧ пеледышыште. Тиде тыгак лийшаш. Тӱрлӧ айдеме, тӱрлӧ калык, тӱс, йӱла. Айдемын чонжо уым палынеже, умылынеже.