Палыза, могай ял

Тÿня мучко шарлыше шучко вирус деч аралалташ манын, «петыралт шинчыме» режимым шукташ ялысе-влаклан эн каньыле. Урем мучко коштшо уке (Тыге ончымаште, ялыште законым шуктышо да мутым колыштшо калык ила, манаш лиеш.), оралтыште да сурт воктене шогылташ, озанлык сомылым шукташ да тыгодым яндар южым оҥ тич шÿлаш лийме йöным ончалаш гын, оласе пачерыште илыше-влак дене таҥастарымаште, нуно ятырлан эрыкан улыт. А пачерыште илышылан мом ыштыман?

Телевизор, компьютер, книга… - кызытсе саманыште лудаш йöратышыже кодын гын. ÿдырамаш-влак кухньышто шогылтыт (Пöртыштö петыралт шинчыме годым пашаш коштмо жапысе деч кочкыш шукырак кайыме нерген ойлышо-влакат улыт.), кече мучко йытыраят, мушкыштыт, кидпаша мастарже шке семын кумылжым луштара.

Конешне, вучыдымо азапыш вочмо тыгай тат кеч-кöмат шонкалаш тарата. Можыч, чытымаш, нелым-йöсым сеҥаш тунеммаш ала чынак мемнам сайынрак шонаш туныктат? Мо нерген? Мутлан, эртыше, тачысе, эрласе нерген... Чыла таҥастарен, ала шкенан, лишыл еҥнан, йолташнан койыш-шоктышнам у ончалтыш дене аклаш тунемына?

Йырым-йырысе пÿртÿснам, шочмо-кушмо вер-шöрнам, илыме вернам, калыкнам…

Кажне кечын, яра кияш огыл манын, сурт-пече коклаште, пачерыште йытырайыме гаяк, ала кöргö чонышкынат, «погынышо пуракым эрыктен», арулыкым ешарена ыле? Пашаш коштмо годым, кÿшнö «шинчыше» тöралан йöраш тöчен, мом шÿдымыштым гына шукташ тыршыме койыш южгунам шонен илаш кÿлмö нерген мондыкта, айдеме вуйдорыкшым тарватылаш öрканаш, а эн удаже - шонаш лÿдаш тÿҥалеш. Тыге роботыш савырна. Шонымыжо ок шу.

Шучко черын вирусшо, вожшым утыр келгыш колтен, мемнан элыштат шарлен толеш. Айдемын шонен, шке уш-акылже дене вискален моштыдымыжо тыштат палдырна да моткоч öрыктара. Пашаш лекде, шкенжын да ешын тазалыкше верч ойгыртен, пандемийлан умбакыже шарлаш корным петыраш манын, суртышто гына шинчышаш олмеш каныме верлашке тÿшкан коштмаш, изи икшыве-влак дене уремлаште пернылмаш але йоча-влакын тÿвыт шке семынышт посна модын куржталмышт мо нерген ойлат? Йот эллаште да ынде мемнан денат черланаш веле огыл, илыш гыч пеш шукын каяш тÿҥалыныт. Тидат ок лÿдыктö. Очыни, мемнан илышын системыжак тыгай парадоксым шочыкта: тöран шÿдымыжым гына шукташ туныктымо, «мутым колыштшо» айдеме лÿдыкшö жапыште трук колыштдымыш савырна - кугыжаныш пунчалым шотыш налде, пöртыштö ок шинче. Молан? Тынар ий жапыште шонаш туныктен огытыл. Шонен моштышо еҥ илышын кеч-могай йогыныштыжо шкаланжат, весыланат, элжыланат эҥгекым ок кондо.

Яра жапнам волгыдырак кумыл дене авалташ да оҥайынрак эртараш манын, шкешотан фотосÿрет викториныш ушнаш темлем. Палена мо шочмо кундемнан географийжым, тÿрлö вер-шöрыштö верланыше ялна-влакым? Кажне сÿрет йымалне ялын лÿмжым да могай районышто верланымыжым ончыктен кертыда.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».