Мыскараче, весела ыле

Чонем пасылтарен, «Чолманыш» эреак возгален шогышо А.Д. Артамонова нерген поро шарнымашем колтем. Чонемлан пешак йӧсӧ, йӱдым помыжалтам, да шонымаш-влак чонемым туржыт. Шке возем, шинчавӱдем тыгак йога…

Палыме лийына. Мый Екатерина Мингареевна Нафикова (Шамсутдинова) улам.

2019 ий 22 январеш пелашем ош тӱня дене чеверласыш. Идалык мучаште А. Артамонова уке лие. Ме чылан Калтаса район У Яш ялеш шочын-кушкынна, иктаҥаш улына, икымше класс гычак пырля тунемна, кылымде дене кылдалтше гай ыльна. Пелашна дене 45 ий пырля илен шуктышна. Аня ден Алексейын ӱмырышт 65 ий веле шуйныш.

Классыштына, тунем лекмеш, коло кокытын кодна. Одноклассник-влак кокла гыч кум мужыр ешаҥе: Аня да Павел Артамонов, мый да Алексей Нафиков, Лидия Матвеева да Евгений Султангареев. Ӱдыр-рвезе жапна колхоз пашаште, кастене клубышто мурен-куштен, веселан эртыш.

Ме Аням изинек «Нюра» манына ыле, пелашыже кӱчыкын «Нюр», пошкудыжо-влак «Аннушка», однокурсникше-влак «Аня» манын лӱмденыт.

Кушто Нюра лийын, тушто эре весела шӱлыш озаланен. «Чолманыш» возымыжым культурнын печатлат ыле, а ойлымыжым колыштат гын, воштыл ярнет. Мемнан деке толешат, эргым изиж годым «Шич, шич, йомакетым ойло» манын йычыга ыле.

Фотоальбомым ончен, сагынен шинчем. Изина годсек мыняр вере пырля возалтынна. Шарнымашат ятырак.

Теве аркаште икияш шудым погена. Бригадир, Аксай павай Апкаликов - Курский кредалмашын геройжо, чыла тӱшка гыч Аня ден когыньнам, кандашымше классым тунем пытарыше-влакым, тарантасеш шынден, шурнывечыш пашаш наҥгайыш. Ты сомылым мыланна арамлан огыл ӱшаненыт - мут колыштшо, пашаче, скромный лийынна. Тунемаш кайымек, сентябрьлан олмешна авана-влак кодыт ыле.

Школышто тунемме годым клуб сцена гыч «воленак» огынал. Концертлаште, спектакльым модмаште участвоватленна. Кандашымше классыште тунемме годым шошо каныш жапыште Бурай районысо Изи да Кугу Шӱкшан, шкенан районысо Торасола, Савакмарий яллаште концертым ончыктыл коштна. Аня дене коктын муренна, куштенна, Алексей (ончыкылык пелашем) гармонь дене шоктен.

Эше Аня кирым нӧлташ уста ыле. Учительский пӧртӧнчылнӧ (Тунам посна пӧртыштӧ верланен.) эре кир шоген - тудын дене директорна П.Т. Тимиряев заниматлен. Сабантуйлаште эре сеҥышыш лектеден (кызыт 80 ийым эртен гынат, нӧлта). Мыняр килограмманжым ом шарне, но Аня, тудым нӧлтен, учительский йыр савырнен.

Студент жапнат Благовещенск педучилищыште пырля эртыш. Аня мый дечем ик ийлан варарак тунеме. Туштат активный студент ыльна, художественный самодеятельностьышто участвоватленна.

Мондалтдыме студент жап! Теле каныш сайын экскурсий дене тӱрлӧ олаш кондыштареныт. Студенческий билет дене корнылан - кеч самолетлан, кеч поездлан - пел акым гына тӱлалтын. Москва, Ленинград, Волгоград, Казань, Йошкар-Ола, Ульяновск… 1973-шо ийыште кок марий группым ик арнялан Волгоградыш намийышт. Тунамат Аня дене ик пӧлемыште пырля илышна.

Шарнымаш-влак шуко улыт, кинокартинысе семын вуй йыр пӧрдыт. Варажымат ешна дене келшышна. Эргымын да изи ӱдыремын сӱаныштым пырля эртарышна. Аня мийыме еда эре жаритлыме кол дене сийла ыле. Пелашыже колым эҥыраш уста улеш. Ик гана, шымше классыште тунеммына годым, зоологий туныктышына Мария Гафиатовна Павелым урокыш колым намияш йодо. Кум уштышым пасу гоч ошкылын, банкеш чонан олаҥгым намиен! Кол кӧргым почын ончыктыльо.

Аня, керек-кушко миен гынат, мылам эре мулинем наледен, а мый тӱрлен пӧлекленам.

Ойган уверым налмек, Уфа гыч шольым звонитлыш, «Ынде кӧн мыскаражым лудына» манеш. Тушто мыйын кок шольым да кок шӱжарем илат, «Чолман» газетым налын лудыт, марий концертлаш коштыт.

Ешарем, Аня кандаш икшыван кугу ешеш кокымшо ӱдыр лийын шочын. А кузе йылмыдыме акаж дене «ойласен» моштен!

Чылажым возен пытараш ок лий. Газет гоч Анян шочшыжо-влаклан эше ик гана ойган чаманымашым каласем.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».