«Те Манякын огыдал?»

«ЧОЛМАН» ГАЗЕТЫМ МАX-ЫШТЕ ЛУДЫНА!

Уремыште иктаж витле наре техника коеш. Толыт, каят, уэш толыт… - шолыт веле. Шукыжо мотоцикл-влак. Майор ден сержант кабинет гыч лектыт, погынышо техникым миен ончат. Вара иктаж вич-куд техникын документшым пеленышт налын пурат. Адак лектыт…

Коло-кумло еҥ погынымек, документым мӧҥгеш пуаш тӱҥалыт. Ончем: лекше-влакын кидыштышт 92-ан цифрым сӱретлыме кагазат коеш.

- Могай мотор сӱретым пуат? - миен йодым.

- Тидым машина тӧрзаш пижыктыман, - маныт. 

А мыйын мотоцикл гына. «Мый ты кагазым кушко пижыктем? Мотоцикл яндаш? Корнышто волен возеш, йӱран годым нӧра. Моло документ коклаш пышташ гын веле? Автомашина-влак ГАИ пост воктеч чошт гына эртен каят, тиде кагазыштым ужын, нуным огыт чаре. А мемнам кажне лукышто чаркалаш тӱҥалыт?» Тыге шонкален шогымем годым мыйын мотоциклемымат ончал кайышт. Саде «92» цифран кагазым вучаш ошкыльым. 

Майор мыйымат председатель пӧлемыш ӱжыктыш. Документем-влакым да саде кагазым кучыктыш.

- Документдам ончалза. Йодшашда уло гын, йодса, - мане. 

Документем-влакым ончальым. Чыла уло. Но, чу, мо томаша? Техпаспортышто «Техосмотр пройден» манме печать да подпись огыт кой. Моло ийлаште пыштат ыле, тений ала-молан уке.

- Мыйын йодышем уло, - майор велыш савырнышым.

- Ойлыза, колыштам.

- Те техпаспортешем печать ден кидпалым пыштен огыдал.

- Йолташ, Те Манякын огыдал?

- Манякын…

- Манякын лиймек, кондыза, ты ситыдымашым чечасак тӧрлена.

Чынак, тыманмеш печатьым темдале, кидпалыжымат пыштыш.

- Те молан «Манякын огыдал?» манын йодда, майор йолташ? - умылынем мыйже.

- Те Шамыкаев Каликайым паледа?

- Палем. Тудо мемнан ялын. 

- Тудат тендан гай йодо. Тудланат печать ден кидпалым пыштышым… - шыргыжале майор.

Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!