Мотоцикл

Ик кече Ванюшка мотоцикл дене пӧртыльӧ да Ашкычыш коштын толаш темлыш. Погынышна да каен колтышна. Кеҥеж шокшо годым мотоцикл дене кудалаш пеш сай, имне дене кайыме гай огыл. 

Ашкыч корно кужу огыл, кок аркам волет да иктыжым кӱзет. Ял воктенсе аркам пеш вашке волышна, ала-молан Курогаш эҥер воктен мотоциклна йӧрен шогале. Шӱгарла воктенсе корнышто кеҥежымат кошкыдымо кугу лакымат лектын ышна шукто. «Мотоциклым ачала да умбакыже чошена дыр», - шонем ынде. Марием олмыкташ ышат шоналте, ала-кушеч кандырам муо, мотоцикл ончыланже кылден сакыш, мылам шӱдыраш кӱштыш. Коремын куакш верже гоч вӱдым келын лекна, йолчиемна нӧрыш. Йӧра эше корнын кок могырыштыжат пушеҥге-влак кушкыт, юалге мардеж пуалеш. Эркын кӱкшакаш кӱзен шуна. «Мотоциклым шӱкен ылыжтена да тайыл аркажым шинчын волена дыр», - шоналтышым. Уке, садыгак шӱдырен волтышна. Йӧра эше Ашкыч воктенсе коремже кошкен ыле. Авий дене изиш уна лийнат, йолын мӧҥгӧ ошкылна.

Эрлашыжым Ванюшка мотоциклжым имне дене налын кондыш. Лач тудо жапыште районышто машинам налаш сераш тӱҥальыч. Мариемат Караидельыш машиналан сералташ каяш погыныш. Мыйже туныктен колтышым: «Изирак машиналан сералт, кугу машинам шӱдыраш йӧсырак лиеш». Эре имне дене коштшо еҥлан машинам ачалаш пуйырен огыл дыр...