Поҥгым моторын чиен кочман

Ынде шке икшывыже-влакат мужыраҥыныт, йочашт уло, но Васли уныка-влакым ужын огыл. Толмышт годым я мӧҥгыштӧ ок лий, я йӱшӧ кия. 

Кеҥежым тудо эре чарайолын коштын, нужым чара кид дене кӱрын, олыкышто тӱрлӧ эм шудым пален, садлан тазалыкшылан ик ганат вуйым шийын огыл.

Уда могыржат лийын: кочывӱдым подылаш йӧратен. Чон корштымыжым нигунам еҥлан луктын ойлен огыл, арака дене «эмлен».  

Ик кечын Качыри ушкалым кӱтӱш луктын колтымыж годым пошкудо Васлин, ведрам кучен, чодыра велыш ошкылмыжым ужо. «Поҥго погаш кая докан, йӧра, ончен толжо, вара мыят каем» шоналтен, Качырий кудывечыш пурен йомо. 

Кас пашам пытарымеке, Качыри Васли дек ошкыльо. Пошкудо, галстукым пижыктен, брюкым, костюмым чиен, воштончыш ваштареш моторын гына ӱпшым шерын шога.

- Кушко погыненат, Васли, ала ӱдырым налаш тарванышыч? Пошкудет-влаклан тунам молан от шижтаре? - мыскарам ыштен, Качыри диваныш волен шинче.

- Ӱдырым налат гын, тудым чикташ, пукшаш, йӱкташ кӱлеш. Кызытсе илышыште мыйын пенсиемат ок сите.

- Вара кушко тыге погынет? - палынеже Качыри. 

- Таче эр юж дене чодыраш поҥго погаш мийышым. Тудым пареҥге дене жаритлаш шындышым. Кӱмыжым вучемат, кочкаш шичнем. 

- Вара кочкаш тыге чиен шичман мо? - адак йыгыла ӱдырамаш. 

- Шарне, Качыри. Поҥгым кочкаш лиеш, но южиктыжым ик гана веле. Мыят, трук аяран поҥго логалеш гын, моторын колынем, - вашештыш Васли.