Тактикым вашталтышым

Ятыр ий ончыч Йошкар-Ола гыч пӧртылмем годым Казаньыште йӱдым поездыш шинчымат, Ульяновск гоч эртен, иктаж сутка наре гыч Уфаш миен шуым. «Кугу озанлыкыште партком секретарьлан ыштем» манмем ала-молан корно йолташем-влакым аптыратыш. Мыйым кугу тӧралан шотлышт гын веле? Мо гынат вашмутланымаш ыш шоч. Тӱрлыжым шонкален, корно мучко соҥгыра да йылмыдыме семын пӧртыльым. Тылеч ончыкылаже тактикым вашталташ шонен пыштышым.

Вес гана Казань гыч пӧртылмӧ годым воктенем вате-марий верланышт. Нуным вагоныш самырык пӧръеҥ ден ӱдырамаш ужатен пурышт. Пеш шокшын чеверласышт.

Поезд тарваныш. Мутланымышт гыч пале лие: ужатыше-влак ӱдырышт ден веҥышт улыт улмаш.

- Икшывыда дене уна лийында дыр? - умылынем.

- Изи эрге уныкана уло. Тудым шочмыж дене саламлаш толынна ыле, - ойла ӱдырамаш.

- Ме шкеже ял еҥ улына. Коктынат фермыште тыршена: мый - скотник, пелашем презым онча. Колхоз вуйлатыше деч кум кечым йодын налнат, толынат шуна. Амалже дене шылым, шӧр-торыкым кондышна, - ешарыш пелашыже.

- А те кӧ лийыда вара? - йодо ӱдырамашыже мый дечем.

Кушеч улмемым каласышымат, ешарышым:

- Мыят тендан семынак фермыште шогылтам - осеменаторлан тыршем.

Тетла мутланаш ыш лий - малаш вочна. Эрлашыжым корно мучко ойласен пӧртылна. Клявлино станцийыш шумо деч ончыч корно йолташем-влак погынаш тӱҥальыч. Мый нуным тамбур марте ужатен лектым. Савырнен пурен, олмешем верланышым. Окнаш ончал колтышым гын, у палымем-влак окна ваштареш шогат. Мыят верем гыч тарванышым, нунын ӱмбак ончем. Поезд тарванымымак вучышт вет. Мыланем кидым рӱзен кодыч.

Шаран район.