Утарен коден

Тиде томаша кодшо курымын шымлымше ийлаштыже лийын. Тунам мемнан ял ӱдыр, Нила, училищым тунем пытаренат, Уфаште моторым лукшо заводышто пашам ышташ тӱҥалын. Шоҥго кова-коча дек пачерлан пурен. Нунышт Октябрь проспект ден Черниковкым ушышо кӱвар лишне, кӱртньыгорно воктене, шке пӧртыштышт иленыт. Зульфия лӱман пошкудо ӱдырамаш дене пеш келшеныт: икте-весыштым ужде, ик кечат эртен огыл.

Ик эрдене пошкудо ӱдырамаш пурен шогалынат, лондем гычак ойлаш тӱҥалын:

- Мунира акай, Тимерша чӱчӱ! Паледа, мый теҥгече кугу поро пашам ыштышым.

- Мом тыгайым ыштышыч вара?

- Мариемын шӱгарышкыже мийышашем нерген ойлымем шарнеда чай? Теҥгече эрдене, кӱлеш арверым да сийым налын, шӱгарлаш кайышым. Ончыч Рашитемын шӱгарже ӱмбач куштырам да шӱкшудым эрыктышым, вара саваржым чиялтышым. Сомылем мучашлымеш, кечывал шуо, шужымем шижым. Пеленем налме кочкыш-йӱышым луктын, мариемым «сийлышым», чаркаш кочывӱдым темалтышым. Шкаланемат чӱчыктышым. Ала чия пушеш, ала кочывӱд вуйыш кайымылан, ала кече пелтымылан кӧра, шижде, савар кӧргешак нералтен колтенам.

Мыняр тыге киенам, ом пале. «Йӱ-йӱ» манме йӱкеш помыжалтым. Ончем, кече вузалын, рӱмбалген. Йӱк шоктымо велыш вуем савыральым. Эй, юмыжат, кок самырыкрак пӧръеҥ нарашта ӱдырым авырен кученытат, виешак йӱктынешт. Ӱдыр утлен куржнеже, но виян кид гыч мучышташ лиеш мо?

А мыйын вуем шелшаш гай пеҥеш. Шуко шонен шогыде, чаркамым кучышым да савар кӧргӧ гыч кидем шуялтышым: «Ӱдыр ынеж йӱ вет. Мыланем темалтеда гын, сайрак лиеш ыле».

Умбакыже мо лиймым каласен мошташат ок лий: шӱгар ӱмбач солнышо йӱкым колын, ик рвезыже, шеҥгек савырнен ончалде, шатыр-шутыр куржын колтыш - йолвундашыже гына йылгыжалт кодо. Весыже, ушым йомдарен, мландыш кроп шуҥгалте. Ӱдырат, чиялтыме оҥаш пызнен, лыдырген волыш.

Мый изигапкам почын лектымат, туткар деч утарен кодымо ӱдырым помыжалтарышым. Вара мӧҥгем кондышым. Гульназ тунемаш толын улмаш. Электричка гыч волен, кокаж дек ошкылын. Но корнеш осал чонан еҥ-влакын кидыш верештын.

- Кызыт утарыме моторет кушто вара?

- Мален кынелешат, кокаж деке ужатен колтем, - каласыш пошкудо вате.

Тиде чын лийше историйым мыланем Нила каласкален ыле.

А. АСЫЛБАЕВА.