Пазар гыч пӧртылшыла

Ожно Алман ял калык утларакшым Тошто Пайгелдыш але Тауларыш пазарыш коштын. Но ик кеҥеж кечын Метрапа, эрдене ӱшкыжшым кычкен, Шаран селаш тарваныш. Коло вич уштыш корным эртен, кече ырыкташ тӱҥалмеш, райрӱдыш миен шуо. Пазар сомылжым куштылгын шуктен керте. Пӧрт гыч пеленже налме кочкышым изиш пурыштат, мӧҥгӧ тарваныш. Кечывал рӱдыштӧ путыракат шокшо лие. Эсогыл мардежшат ок пуал.

Мӱндыр корнын ик кумшо ужашыжым эртымек (Тиде лачак Пекул ял вуйышто лие.), ӱшкыжын чытышыже пытыш: тудо ончылтен вашкерак ошкыльо, вара кудал колтыш. Метрапа орва тыртыш-влак шаланыме деч пеш лӱдӧ. Ял кугу огыл. Кӧн дыр урем капкаже комдык почылтын ыле. Ӱшкыж кудывечыш кудал пурен кайыш.

Тиде жапыште пӧрт кӧргыштӧ йӱк-йӱан нӧлталте. Кенета пӧртӧнчыл омса почылто. Оза ден ватыже, эше икмыняр еҥ кинде-шинчал ден кленча-корка-влакым кучен лектын шогальыч.

Тиде суртышто унам вученыт улмаш. Вашлийше-влак ӧрын колтышт, йӧршын палыдыме пӧръеҥым пӧртышкышт ӱжын пуртышт. Ӱстел коклаш шынден, пукшен-йӱктен ужатышт. Сийланымек, Метрапан шыдыже пасылыш, ӱшкыжшат ӱмылыштӧ шоген каналтыш.

А. АСМАЕВ.