Ий-влак куржыт, но чон ок шоҥгем

«ЧОЛМАН» ГАЗЕТЫМ МАX-ЫШТЕ ЛУДЫНА!

Назира Якупова «сар жапысе икшыве-влак» гыч улеш, 1936 ий 1 октябрьыште Бахча ялыште шочын. Куд тылзашак ава деч посна кодын. Ачаже вес ӱдырамашым налын, эше кок ӱдыр да ик эрге шочыныт. Ачаже фашист-влак ваштареш кредалаш каен да сар гыч пӧртылын огыл. Тулыкеш кодшо ӱдырым кокаже ончен куштен.

Кугу Отечественный сар жапыште илыш неле лийын. Назира изинек кугыеҥ-влак дене пырля пасушто тыршен, вольыкым ончен, чодыраш пу ямдылаш коштын. Вуеш шумек, Акпарс ялыште илыше Мусагит Якуповлан марлан лектын. Коктынат ӱмырышт мучко лесничествыште пашам ыштеныт. Назира Султановна кеҥежым питомникыште пушеҥге-влакым куштымаште тыршен, телым цехыште мочыла гыч кистычкым пидыныт. Н.С. Якуповам пашам сайын ыштымыжлан шуко гана Чап грамот да окса премий дене палемденыт, пашан ветеранже улеш.

Марийже дене пырля пӧртым чоҥеныт, кум эргым ончен кугемденыт. Ындыже марийжат, кум эргыжат илыш дене чеверласеныт, но тудо куштылго илышым кычалын огыл, чыла неле-йӧсым сеҥен лектын.

Назира Султановна кызытат яра, паша деч посна ок шинче: пӧрт сомылым шукта, кевытышкат шке коштеш, йолташыже-влак дене миен-толын ила, чодыраш коштын савырна. Мыйын шонымаште, тарванылмаште - кужу илышын секретше.

А.А. Акбердин - районыштына палыме да пагалыме еҥ. А айдеме мо дене чаплана? Илышыже, койыш-шоктышыжо, пашаж дене. 

Асылгарей Акбердин 1946 ий 28 сентябрьыште Урсай ялыште шочын. Кушнаренко ял озанлык техникумышто агрономлан тунем лектын. Краснополянский совхозын Шаран отделенийыштыже пашам ышташ тӱҥалын. Паша деч кӱрылтде, Уфаште Ял озанлык институтышто шинчымашым поген. «Акбарисовский» совхозым почмеке, шочмо кундемышкыже пӧртылын. Мешер отделенийыште агрономлан, Рӱдӧ отделенийыште управляющийлан, вара, пенсийыш лекмеш, совхозын тӱҥ агрономжылан ыштен. Сай пашажлан шуко Чап грамот дене, В.И. Ленинын 100 ияш юбилейже лӱмеш медаль дене палемденыт, пашан ветеранже улеш. Асылгарей Асылкаевич - ешыштат чылалан пример. Светлана Мефодьевна пелашыж дене ныл икшывым ончен куштеныт. Сергей, Татьяна да Юрий Уфаште, Наташа ӱдырышт пеленышт илат. Татьяна Акмулла лӱмеш БГПУ-што студент-влаклан йот йылмым туныкта, Юрий аграрный университетыште преподаватель да тӱҥ энергетик улеш.

Ӱмаште Асылгарей Асылкаевич ден Светлана Мефодьевна шӧртньӧ сӱаным палемденыт. Ийготым погеныт гынат, илышыште чолга улыт, икте-весыштым пагален да ваш полшен илат. 

Юбиляр-влакым Акпарс ялсовет администраций вуйлатыше Р.Г. Ягудин, Чодыра озанлыкысе ветеран-влакын ушемышт лӱм дене А.А. Давлетшин, Акпарс школ директор Г.Ф. Габдрахманова да молат саламлышт. А предприниматель Н.М. Давлетова тиде гана юбиляр-влакым мӧҥгышкышт миен саламлен.

Пагалыме лудшына-влак, ВК ден Одноклассники соцлаштыклаште вераҥдыме уверым каҥашаш ушнаш ӱжына!