«Полшен кертмемлан моткоч куанем!»

Гулшикар кокай - моткоч кумылзак айдеме. Мӧҥгышкыжӧ толшо кажне еҥым чай дене сийла. Мыйымат тыгак вашлие. Мутланаш тӱҥалмек, ончыч илыш корныжым шергална. А тудыжо куштылго лийын огыл. Гулшикар Шамшеевна 1946 ий 9 февральыште Шаран районысо Урсай ялеш шочын. Ачаж ден аваже тыглай кресаньык лийыныт. Ешыште 9 йоча кушкын (кызыт нылытше илыше улыт). 

Ӱдыр Урсай тӱҥалтыш школышто, 5-8-ше класслаште Мешер школышто тунемын, но кыдалаш шинчымашым налаш йӧнжӧ лийын огыл. Окса чӱдылыкым шижын, 17 ияш ӱдыр Свердловск кундемыш торф лукмашке пашам ышташ каен. Идалык гыч шочмо ялышкыже пӧртылын, да тудым вигак Мичурин совхозын Мешер отделенийышкыже дояркылан налыныт, а фермыже Урсай воктенак лийын.

«Тунам фермыште 450 лӱштымӧ ушкал лийын, доярке-влак шукыжо самырык ӱдыр-влак лийынна. Фермыште пеш весела ыле, еҥ шуко, чыланат пашам сайын ышташ тыршенна, икте-весылан полшенна», - рвезе жапшым шарнен ойла кокай.

1971 ийыште ӱдыр Акпарс ял рвезе Дмитрий Бахтиярович Мадияровлан марлан лектын, пелашыж дене коктын пеҥгыде ешым чумыреныт. Пелашыжын аважат нунын дене пырля илен.

1972 ийыште «Акбарисовский» совхозым ыштеныт. Вате-марий коктынат эр гыч кас марте лым лийде озанлыкыште тыршеныт. Гулшикар кеҥежым 2 гектар мландыште кормалык ревым куштен, телым амбарыш пашаш коштын. 1981 ийыште Шаран лесничествыш пашаш куснен. Тушто кеҥежым питомникыште пушеҥге озымым ончен куштеныт, телым чодыра озанлыкын цехыштыже мочыла гыч кистычкым пидыныт. Гулшикар Шамшеевна чодыра озанлыкыште 20 ий тыршен. Сай пашажлан «Ударник коммунистического труда» знак, окса премий, таумутан серыш да Чап грамота дене палемденыт. Икана гына огыл «Знамя Октября» район газетыш моктен возеныт. 

Еш илышыштат шке радамже дене воранен, но икшыван лияш пӱрен огыл. Вате-марий сурт сомылым пырля виктареныт, вольыкым, кеҥежым сурткайыкым ашненыт, тӱрлӧ пакчасаскам куштеныт. 

Озавате яра жапше улмо годым кидпашам ыштылаш йӧратен. Шуко мындерӱмбалым, ончылсакышым, салфеткым, солыкым тӱрлен да шкеак чыла урген. Варарак крючок дене пӱкен, диван леведыш-влакым, кӱварыш шарыме палас-влакым шуко пидын. Эн шергылан шке куымо ковер-влакым шотла. Тудым утларакшым телым куэныт, озаватылан шоҥго авашт ден пелашыжат полышкаленыт. Гулшикар Шамшеевнан кидпашаже-влакым тӱрлӧ выставкылаште, конкурслаште ончыктылыныт, моштымыжым чыла вереат кӱкшын акленыт. Диплом ден пӧлекше-влакым кызытат арала, но ынде шинча нойымылан кӧра кидпашам шуэнрак куча.

Чыла сай лийын, но трук ешыш ойго толын, Ончыч авашт, ик ий гыч 30 ий икте-весылан эҥертен, йӧратен илыме Дмитрий пелашыже вучыдымын илыш гыч каеныт. Ӱдырамашлан ойгым чыташ куштылго лийын огыл, ынде пелашыж деч посна 26 ий суртым куча. Кокай дек шӱжарже, шольыжо да нунын икшывышт толын коштыт. Тудо чылаштым йӧрата, кажныжым шокшын вашлиеш. Пошкудыжо-влак дене келшен ила, юбилей пайремжымат пырля погынен эртареныт. Тудын суртыштыжо эреак поро шӱлыш озалана. 

Гулшикар Шамшеевна 2001 ий годсек сулен налме канышыште улеш. Кызытат кеҥежым чывым ашна, емыжым погаш коштеш. Пӧрт кӧргыжым да кудывечыжым арун куча. Кеҥежым пакчаште пареҥгым, пакчасаскам шында да шкеак ончен кушта. Ялыште эртарыме мероприятийлашкат мийыде ок код. Чыла вере участвоватла, кӱлеш годым каҥашым пуа. Пайрем-влак годым лӱмынак коҥгаш кӱэштме тамле мелнажым намия да калыкым шунен-шунен сийла, ожсо годсо такмак-влакым муралтен колта. Пытартыш жапыште «Акпарс» волонтер клубыш кумылын коштеш. «Салтак-влаклан изиш гынат полшен кертмемлан моткоч куанем!» - манеш тудо.