«Мый пиалан айдеме улам», - ойла Кугу сарын икшывыже А.К. Апканиева.

Александра Константиновна «сарын икшывыже» улеш: тудо 1939 ийыште шочын, тачысе кечылан 86 ийымат эрталтен. Шкет икшывым аваже да коваже ончен куштеныт. Йоча жапше пеш нелын эртен, вет тудо сар пагытыште кугемын. «Авамын кум изажат: Кӓрӓй, Кӓндий, Кӓлӓмшӓ - Кугу Ачамланде сареш вуйыштым пыштеныт», - эртыше жапым тудо кызытат раш шарна. Авам школышто кум классым веле тунемын. Изинек пашаш шуаралт кушкын, мутшо гыч, пашам ышташ пеш йӧратен. Ондак тӱшка ял озанлыкыш пакча пашаш коштын. Тушто нуно киярым, ковыштам, помидорым куштен ужаленыт, райрӱдышкат колтеныт. Тулеч вара, 1958 ийыште, Александра Константиновна Свердловск областьыш Медный поселкыш торфым лукмашке каен. Тушто апрель гыч октябрь марте ыштеныт. Вес ийжылан Ленинград областьысе Рахия станцийыште верланыше Соколия поселкышто тыршен. «Тушто кермычше пеш кугу ыле. Трактор тудым гусеницыж дене пӱчкын каен, а ме «змейкыш» оптенна», - каласкалыш авам.  

Александра Константиновна ӱмыр пелашыжымат тиде ялыштак вашлийын. 1960 ий 28 январьыште Анатолий Апканиевич Апканиев дене ешым чумыреныт. Пелашыж дене кандаш икшывым ончен кугемденыт. Авам шкеже кугунак тунемын огыл гынат, нуно чылаштымат туныктен луктыныт - икшывышт-влак дипломан улыт. Чолга ӱдырамаш пелашыжымат бухгалтерлан тунемаш таратен. 

Шуко икшыван авалан илышыштыже ятыр йӱштӧ-шокшым, нелылыкым чыташ логалын. Тудо шочмо ялыштыже 28 ий ушкалым лӱштышылан тыршен. Тачысе кечын Александра Константиновна шкенжым эн пиалан айдемылан шотла: тудым 23 уныкаже, 26 кугезе уныкаже куандарат. Тиде илышыште эн кугу пиал!