Шошымсо декада уэш пырля чумырыш

Кугурак уна-влакат -  Москва гыч «Народный карнавал» проектын авторжо, дизайнер И. Гончарова, скандинавла ошкылмашын инструкторжо, «Московское долголетие» проектын соучастникше Л. Литус, Ульяновск область гыч РФ заслуженный туныктышыжо В. Маркова, кодший мемнам Алтайыште уна семын вашлийше Зарубинмыт еш - толыныт ыле. 

Декада жапыште тӱрлӧ мероприятий-влак лийыт: врач, юрист-влак лекцийым лудыт, оҥай экскурсийым, куштымаш дене мастер-классым, тренингым эртарат, массажым ыштат, молыжат. «Эрыкан микрофон» касыште декадын участникше-влак шочмо олашт, районышт нерген каласкалышт. «Алло, ме талантым кычалына!» конкурсышто усталыкнам ончыктышна. Мыланна поснак «Бал цветов» карнавал ойыртемалтше шарнымашым кодыш. Санаторийыш мийыше-влак мотор тувырым чиеныт, шляпам упшалыныт. Чыла тидым нуно пеледышым ямдылыме мастер-классыште шкеак ыштеныт. Пайремым мотор куштымаш, муро, И. Гончарован коллекцийже гыч чумырымо вургем дефиле сӧрастарышт. Кугурак тукымын декадыже - кӱлешан да пайдале проект. Тудо илалше-влаклан куаным да илыш вийым пӧлекла!