Саня кокам мылам кече гай улеш

Тиде кечылаште ковамын шӱжарже, Пӱрӧ районысо Курмызак ялыште илыше Александра Русиевна Бадреева 90 ийым тема. Тудо 1933 ийыште У ий вашеш шочын, шочмо кагазыштыже кечыжым 1934 ий 16 апрель манын возымо.

Илышыже куштылгак лийын огыл. Ешыштышт кум ӱдыр кушкын, Саня кокам кыдалаш лийын. Икымше классыште изиш тунеммек, Руси кочам «Буквам палет, шотлен моштет, сита» манын. Тыге тудо школыш коштмым чарнен. Ачаж дене пырля кажне кечын чодыраш коштын, тудлан полышкален. Ешым погымекыже,  пелашыж дене кужу жап илаш пӱрен огыл, марийже ош тӱня гыч каен. Тудын кидыште кок эрге икшыве кодын. Ялыште шала пашаш коштын. Кок икшывым шкеак йол ӱмбак шогалтен, шинчымашым пуэн. Кызыт тудым ныл уныка, куд кугезе уныка куандарат. Кеҥежым тудын суртшо мӱкш омартала гӱжла: уныка-влак толын, тудлан ямым пуртат.

Саня кокам моло еҥ гай огыл. Тудо эреак шыргыжеш, тиде шыргыжмаш тудын чурийжым самырыкрак да волгыдырак ышта, шинчаже сескем гай ылыжеш. Тудын деке унала мийыме годым эре ӧрам: уремыште кеч-могай игече лийже - лавыран, ночко але пуракан, суртышто ик пырче шӱкымат от уж, пӧрт кӧргыш тошкалын пураш ӧрын шогет - йырым-йыр ару. 90 ийым тема гынат, кокам яра ок шинчылт, чывым онча, кеҥежым пакчаште шогылтеш. 

Саня кокамлан эн тӱҥжӧ тазалыкым тыланем. Тудо мылам пример семын улеш. Кеч-могай нелылык лектеш гынат, вуйым сакыман огыл, эре ончыко кайыман. Мемнам эше шуко ий куандарен иле.