Эртыше идалык шарнымашлан поян

Эртыше ий Наставникын да туныктышын идалыкышт ыле. А мыланна, илалше ийготыш шушо, витле вич ий деч кугурак-влаклан, тудо эшеат лишыл лийын. Мемнан кокла гыч шукынжо всероссийский конкурслаш, «Творцы истории» акцийлаш ушненыт. Мылам эртыше идалыкыште Калтаса селасе икымше школышто лияш логале. Тушто 1982 ий кеҥежым Волгоград олашке, Кугу Ачамланде сар годсо верлашке, Сталинград олам аралыше-влакым пагален шарналташ миен толмем нерген каласкалышым. Тусо вер-шӧрыш «Дружба» производственный бригадын, Ӱлыл Качмаш школын «Юность» паша да каныме лагерьын еҥже, тунемше-влак дене мийышна. Тидын нерген альбомымат сӧрастарышна. Тидлан нылле утла ий эртен гынат, тушто чыла шарнымаш аралалтеш. Ме, кудло, шымле ияш деч кугурак-влак, шуко оҥайым каласкален кертына. Меат историеш пале кышам коденна!

Республикыштына кугурак тукымлан кугу тӱткыш ойыралтеш. «Башкирское долголетие» программа веле мом шога! Тудын дене пырля Уфа оласе «Зеленая роща» да Сочи оласе «Бургас» санаторийлаште кок ий наре «Кугурак тукымын декадыже» проектым илышыш шыҥдарат. Проектым калыклан таза илыш-йӱла нерген каласкалыше «Искусство здоровья» регионысо мер ушем правленийын председательже Рима Шайдуллина вуйлата. Тудлан кӧра пенсионер-влак санаторийыш коштын, икте-весе дене вашлийын, палыме лийын да чон почын мутланен кертыт. Чынжымак, шарнымашна ятыр погынен. Тыгак ме «Алло, усталык шӱлышан-влакым кычалына!» конкурсышто вийнам тергена. 

Сочи оласе «Бургас» санаторийыште кугурак ийготан-влакын декадышт годымат талантан-влак усталыкышт дене куандарышт. Тушто кажнына мурым мурыш, куштыш, почеламутым лудо - ветеран-влак пуйто икмыняр ийлан самырык годсо жапышкышт пӧртыльыч. Врач, тӱрлӧ ведомство-влакын пашаеҥышт дене вашлийын, ме канена, у шинчымашым налына, эмлалтына. Тушко мийыше-влак кушташ туныктымо да моло тӱрлӧ мастер-классыште шуаралтыт. Поснак Уфа, Салават, Нефтекамск, Ишимбай, Агидель олала, Краснокам, Гафури, Бурай, Альшей, Караидель, Нуриман, Мишкан, Калтаса районла гыч чумыргышо-влак шкем чолган ончыктат. Палемдыме жапыште санаторийлаште мемнан район гыч веле 25 утла еҥ каналтыш. 

Тыгак идалык мучашыште Сочи оласе «Бургас» пансионатыште «Танцы. Музыка. Душа» тазалыкым пеҥгыдемдыше, сай кумылым пӧлеклыше, у шинчымаш дене пойдарыше кугу фестиваль эртыш. Тушко ветеран-влак Российын тӱрлӧ регионлаж гыч миеныт ыле. Нунын коклашке меат, Башкортостан Республика гыч 80 еҥан делегаций, логална. 

Тыгай вашлиймаш-влак теният лийыт манын ӱшанена. Кодший Алтайыш миенна гын, тений Байкалым ужын толаш кумыл уло.