Ветеран-влаклан сай пӧлек

Илалшырак-влаклан «Башкирское долголетие» проект - кугу пӧлек. 14 сентябрьыште меат, 34 еҥан тӱшка, комфортабельный автобус дене Уфаш коштын толна. Тиде гана Акбарисовский сельский поселений гыч Акпарс, Усола, Уял, Урсай да Шалтык ялла гыч шукын миеныт. Эсогыл Акпарс школ гыч ветеран туныктышо-влак гына визытын лийынна. 

Экскурсий программыжат оҥай ыле. Национальный музейыш пурышна, кок пачашан автобус дене Уфам ончен коштна, олан исторический ужашыштыже  йолын кошташат келшыш. Чыланнанат Минигали Шаймуратовын памятникшым ужмына шуын. Ужна веле огыл, экскурсовод герой нерген шуко оҥай историйым каласкалыш. Эше пырля погынен велалтна. Тиде кечынак «Айда играть» фестиваль тӱҥале. Туштат ончен коштна, тӱрлӧ йомакысе герой-влакым ужын, йоча семын куанышна. А «Император» теплоход дене, Келшымаш монумент гыч тӱҥалын, Салават Юлаев памятник марте Ош Виче дене кайыме годым мыняр мотор верым ужна! А шыже пӱртӱсшӧ! Теплоход да автобус корныштат куанен да кугешнен ончен эртышна. Игечыжат лӱмынак кеҥежымсе гай шокшо ыле. Кугу тау автобус водитель Валерийлан сайын кондыштарен толмыжлан, фельдшер Александр Агапитовлан, Уфаште порын вашлийше да экскурсий мучко пеленна лийше куратор Айгуль Хабибуллиналан.

Ялыште илыше пенсионер-влак шукыж годым суртыштым, сомылыштым коден каяш ӧрыт. Мыйын шонымаште, кид-йол модмо, шинча ужмо, пылыш колмо годым  шкенан республикынам ужын кошташ йӧным муашак кӱлеш. «Башкирское долголетие» программа чынак пашам ышта. Кугу тау!