Тыге чонна самырык кодеш

Тусо вер-шӧрыштӧ каныме вер-влак ятыр улыт. Ме «Рубин» каныме пӧртыштӧ илышна. Уло кумылын канышна, тушто эртарыме тӱрлӧ оҥай мероприятийлаш ушнышна.

«Айста палыме лийына», «Мемнан саламнам налза!», «Чылан шарнымаш дене илена!» касым, тӱрлӧ модышым, конкурсым, дискотекым шкеак ямдылышна да эртарышна. Чолга еҥ-влак кокла гыч поснак М. Насибуллинам, Р. Турицынам, Т. Алушкинам да Краснохолмский села гыч мурышо да куштышо «Вдохновение» ансамбльым палемдаш лиеш. Ме вӱдеш йӱштылна, эҥер серыште кечеш кӱна. Кажнына кап-кыл денат, чон денат каналтыш - кум кече жапыште идалыклан ситыше вий-куатым поген толна. Тиде канышна райадминистрацийын, «Рубин» каныме пӧртын пашаеҥже-влакын тыршымыштлан кӧра сайын эртыш. Ныл гана пукшышт, йӧнан илыме вер-влак, душ, холодильник, утюг - мо кӱлеш, чыла лийын. Здравницыште чыла вере ару. Тудын вуйлатышыже Динарын каныше-влак верч азапланымыже шижалтеш. «Рубиныш» ме кажне ийынат мияш тыршена. 

Ты гана санаторийыште лийме татым Уфа да Туймаза олала гыч мийыше уна-влак сӧрастарышт. Тиде республикыште «Кугурак тукымын декадыже» проектым вуйлатыше Р.Р. Шайдуллина да «Зеленая роща» санаторийыште эртыше кеҥежымсе декадыште чолгалыкшым ончыктышо В.Б. Арсланова. Рима Римовнам ятыр еҥ пала, очыни. Тудо калыкым таза илыш-йӱлалан кумылаҥдыше «Искусство здоровья РБ» кундемысе мер ушемым вуйлата. Нуно мыланна проектыш (Тиде проектлан тений 15 ий.) ветеран-влакын ушнен кертмышт нерген каласкалышт. 

Врач-влакын мутышт почеш, тыгай канышыш кеч кум кечылан миен толаш пайдале. Айдемын каньыле средаш логалмыже, ойыртемалтше режим почеш илымыже тудлан вий-куатым ешара, тазалыкшым саемда. Меат лач тыгай: йырым-йыр мотор, лӧза пеледыш кушмо, шинчын каналташ йӧнан беседка-влак улмо, мангалым вераҥдыме, мончан, кок-кум номеран кум пачашан зданиян - вер-шӧрыштӧ каналтышна. Вес ийынат кеҥежым, пырля чумырген, пӱртӱсын тиде сылне лукыштыжо - Туймаза районысо Кандрыкуль ер воктенсе «Рубин» каныме пӧртыштӧ - тазалыкнам пеҥгыдемдена, жапым пайдалын эртарена манын ӱшанена.