85 ий - кӱчык корно огыл

85 ий - кӱчык корно огыл. Тидым Анюта кокайын илышыже пеҥгыдемда. Тудо Кнай ден Микайдарын икымше икшывыже. Ӱмыргорныжо Монар ялыштак эртен. 12 ияшыж годым колхозышто пашам ышташ тӱҥалын - ончыч амбарыште шурным пуалташ полшен, вара кугурак-влак дене шудым погаш коштын. Шке кундемыште шудо шагал улмылан кӧра пелкат кошташ верештын. Шурным кыраш вийжым пуэн, вет кырыме машинам коляска дене шӱдыраш логалын, а имне-влак пӧрдыктеныт. 

Пиалжым Анюта кокай Монар ялыште вашлийын. Ешым чумыреныт, вич икшывылан илышым пӧлекленыт. Икшыве ешым сӧрастара, ямым пурта, ава-ача кокласе кылым пеҥгыдемда. Чаманаш логалеш, ӱмырым пырля эртараш логалын огыл - пелашыже илыш дене чеверласен. «34 ияш школышто техничкылан пашам ышташ тӱҥальым, - шарналта Анюта кокай. - Кузе пашаш пурымем тачат шинчаончылнем. Тиде омыштем лийын. Егор Захарович пуйто мыланем ойла: «Анюта шӱжар, ала фермыш презым ончаш миет?» Эрдене омем шонен коштым. Изиш лиймеке, школ директор А.А. Николаев мыйым школыш ӱжыктыш, техничкылан пашаш мияш ӱжӧ. Мый келшышым. Эрдене вич шагатлан коҥгаш олташ каена ыле. Йоча-влак тунемаш толмешке школым ырыкташ кӱлын. Пум кид дене ямдыленна - пӱчкынна, шелыштынна да артанаш оптенна. Кӱварым мушкашат «лентяйкым» кучылтын огынал. Тыге, сулен налме канышыш лекмешке, школышто ыштенам». 

Анюта кокайлан 85 ий гынат, вий-куатше эше шижалтеш. Уремыште ошкылын огыл, эркын гынат, куржын коштеш. Мӧҥгыштӧ, кап-кыл ынже корж манын, тӱрлӧ упражнений-влакым ыштылеш. Коклан тазалыкше начаремме годым дарум ок йӱ: тудын шудо гыч ямдылыме шкенжын эмже уло. Кызыт Анюта Михайдаровна суртышто шкетын ила. Славик эргыже ялыштак вераҥын, моло икшывышт, уныкашт-влак толын коштедат. Эше социальный пашаеҥ У. Пекулаева полышым пуа. Кувавам лу уныка ден кандаш кугезе уныка куандарат. 

Лӱмгече - тиде илыш-корным аклыме жап. Илыш - пӧлек. Ветеран-влак совет лӱм дене Анюта кокайлан тыгай тыланымашым каласена:

«Ӱмырет кечыйол гай 

                  волгалтше кужун,

Тазалык капет ден чонетым

                                      вӱчка.

Тыланена шуко ийым 

                    илаш йывыртен,

Шочшет ден уныкатлан 

                               куанен».