Ветеран-влак «Салют» лагерьыште каналтышт

Лагерьыште путевка почеш кугурак ийготан 40 еҥ - «ший ийготан» волонтер, ветеран толкынын активистше да жапым веселан, пайдалын эртараш шонышо-влак - каналтышт. Тиде чынжымак йоча да самырык годсо татыш пӧртылмӧ пайрем ыле!  

Ме, каныше-влак, «Орлята» ден «Октябрята» отряд-влаклан шелалтна. Кажныжын шке девизше, речевкыжо да мурыжо ыле. Нуным кок вожатый - образований пӧлкан методистше-влак Р. Перелыгин ден В. Зайнашева - вуйлатышт. Вожатый-влак мыланна оҥай программым ямдыленыт. «Сорта» ден «Мыйын йӧратыме сомылем» палыме лийме кас моткоч ямлын эртышт. Тунам кажныже девизшым ойлыш да хоббиже нерген каласкалыш. Девиз-влак, мутлан, тыгай ыльыч: «Шӱм-чоным ылыжтен мошташ!», «Еҥым пиаланым ышташ», «Кӧ ок йӱлӧ, тудо шикшаҥын эҥеш», «Мом ыштенат, чыла шке декет пӧртылеш», «Айдемылан куаным пӧлеклен, кажне сомылым йӧратен шукташ, чоным пыштен ышташ», «Кайыше еҥ веле корным эртен сеҥа», «Илыш опытым уш-акылыш погаш» да молат. Мемнан ветеранна-влак мом гына огыт ыште - пидыт, тӱрлат, ургат, когыльым да тортым кӱэштыт, пакчасаскам куштат, телылан ямдылат. Палисадникыштышт пеледышым ончен, шинчат куана. 

Кажне отряд пырдыжгазетым ямдылыш, вара тудын мом ончыктымыжо нерген каласкалыш. «Ме - 60-шо ийласе пионер-влак. Арверна - горн ден барабан. Маршрутна: эре тунемына, сылнылык тӱняште; виян, чолга да уста», «Шӱдӧ ий марте илаш, мотор, самырык лияш», - рӱж ойленыт отрядын участникше-влак. 

Каныше-влаклан тыгак шун гыч модышым ямдылыме мастер-класс пашам ыштыш. Занятийым Йоча-влакын усталык пӧртыштын ешартыш образований педагогшо К. Минилбаева эртарыш. Шке кид дене ямдылыме черепаха, тумна, моло сувенир «Салют» лагерь нерген ушештараш тӱҥалыт. Йога дене мастер-классым В. Янсубаева эртарыш. А эше ме ялым ончен савырнышна, дискотекыште куштышна. Тыгак массаж да визажистын мастер-классышт куандарышт. Нуным С. Раянова ден В. Искибаева эртарышт - кап-кыл тазалыкым, ӱдырамашын моторлыкшым арален кодымо йӧн-влак дене палдарышт. Эрдене физзарядкым ыштена ыле. Тидлан мемнам Краснохолмский селасе икымше йочасадын ончычсо пашаеҥже Т. Вострецова таратыш. Кечеш вич гана пукшеныт. Тамле кочкышым повар-влак Л. Сайпушева ден Э. Манисова ямдылышт. 

Сменым «Тендам йӧратен…» каныш кас мучашлыш. Кажне отряд концертым ямдылыш. Тыште мыланна «Вдохновение» ансамбль полшыш. Нуно тыгак спорт куштымашым ончыктышт. Т. Валикаева весела такмакше-влак дене, Т. Алексеева «Простая история» кинофильм гыч  романс дене куандарышт, мый да Э. Егорова шкенан возымо почеламутнам лудна. Тиде кечын «Взвейтесь кострами, синие ночи», «Мы из деревни родом» муро-влакат йоҥгышт. 

Эше Калегин ялысе историй да краеведений музейыш мийышна, пырля возалтна. Калегин кундем поян,  патриотизм шӱлышан историйже дене чаплана. Районысо Советын Ушемын ныл геройжо гыч кокытшо тиде вер-шӧр гыч улеш. Тиде лейтенант-влак В.С. Васильев («Салют» тазартыме лагерь воктене тудлан обелискым вераҥдыме) да П.И. Сюткин  (шӱгарже Калегин ялысе паркыште верланен). Сылвий ялыште Граждан сарын геройжо Ш.К. Кудаевлан постамент уло. Ме шонымашым возымо книгаште шке ойнам возен кодышна. 

Чеверласыме годым лагерьын директоржо Э. Иштуганова «сменын участникше-влак, самырык годсо волгыдо илышыш, октябренок ден пионер лийме жапыш пӧртылын, тусо саманын шӱлышыжым шижын кертыч» манын палемдыш. Чынжымак, ме тудо каныш кечылаште сай кумылан, нимучашдымын куаныше лийынна, кеч ик жаплан йоча годсо жапышкына пӧртылна. Шӱм-чоннам волгыдо шарнымаш авалтыш, самырык улмына гаяк чучо. 

Мераҥ ялыште идалык мучко пашам ыштыше тазартыме рӱдерым почмыжлан райадминистрацийым вуйлатыше Забир Габдуллинлан кугу таум каласена. Тыште вӱд, душ, шокшо, мебельым вераҥдыме волгыдо пӧлем-влак, столовый улыт, лагерь пеленсе вер-шӧрыштӧ асфальтым шарыме, спорт площадкым чоҥымо, садлан тудым тичмаш санаторийлан шотлаш лиеш. Тек тыгай вашлиймаш-влак кугурак тукымым ончыкыжат куандараш тӱҥалыт.