Усталыкыштым, поро кумылыштым молыланат пӧлеклат

Ушемын лыжга ӱдырама-шыже-влак дене тендамат палдарыме шуэш. Весела, чолга Т.Н. Пасетова Бирск районын шочшыжо улеш. Келтейыш марлан лекмеке, пелашыж дене ондак Агидельыште иленыт, кӱртньыгорнышто монтерлан ыштен. Ялыште пӧртым чоҥеныт да илаш пӧртылыныт. Н.М. Яковлева Нефтекамск ола гыч шочмо велышкыже пенсийыш лекмекыже илаш куснен. Тыматле, мотор ӱдырамаш ӱмыржым медицинылан пӧлеклен. А.И. Ибаева, ветеран ушемын председательже, татар калыкын шочшыжо улеш гынат, марий тӱвырам пагала. Шарипово ялыште шочын-кушкын. Сельпош пашаш толын да илашак кодын. М.Т. Кутлубаева ден Е.Д. Сайтиева клубыш занятийыш Кутерем гыч йолын коштыт. «Тиде тазалыклан пайдале», - ойлат нуно. М.Т. Кутлубаева, Изи Агытан ялын шочшыжо, лу ий верысе ял поселенийыште управляющийлан ыштен. Е.Д. Сайтиева ятыр жап Келтей сельпошто кевытчылан тыршен. Р.А. Илтубаева ятыр ий ялысе тӱвыра пӧртыштӧ техничкылан ыштен. Тудо мланде пашам, пеледышым ончен кушташ йӧрата. Марий тувырым ургышо Т.Я. Даниловам ял деч ӧрдыжтат сайын палат. Тудо книгам, журналым лудаш кумылан. Р.С. Изимариева кидпашалан изинек шӱмаҥын кушкын, шочмо кечыжлан шкаланже тений кугу пледым пидын.  Тудо ончыч «Ремстрой» ООО-што пашам ыштен. 

М.И. Ислаева, «Озавате» клубын вуйлатышыже да мыйын авам, профессийже дене бухгалтер улеш гынат, 43 ий библиотекыште тыршен. Тудо шке пашажым моткоч йӧрата.     

Весела, тыматле, чолга, поро кумылан ӱдырамаш-влак суртыштат ушан-шотан озавате улыт. Пелашышт дене икшывым ончен куштен, тачысе кечын уныка ден кугезе уныка-влаклан куанен илат.