Валентина ковайлан - 99 ий

Валя ковайлан шуко ужаш пӱрен, илышыжын кажне йыжыҥже ушешыже лакемалт кодын, чылажымат шарнен каласкален пуэн кертеш. Ешыштым: аважым, Валям да Вера шӱжаржым - раскулачитлен, Иркутский областьыш колтеныт. А ачаштым Уфаште четлык коклаш петыреныт, тудо тетла пӧртылын огыл. 

Авашт шахтыште пашам ыштен. 15 ияш Валям, «Шахтыште пашам ыштен от керт» манын, шкетшым ялыш колтен. Документше укелан кӧра нӧргӧ ӱдырлан кок тылзе тюрьмаште шинчаш пернен. Вара грамотан еҥ-влак йодмашым возаш полшеныт. Тудым Уфасе тюрьма гыч мӧҥгеш Иркутскыш шынден колтеныт.

Ик пагыт гыч Валя уэш ялыш пӧртылын. Тудо жаплан рушла гына ойлен моштен, шочмо йылмыжым монден. Ялыште телефонисткылан, кладовщиклан ыштен, имньым ончен. Сар ийлаште пӧръеҥ сомылымат ворандареныт. Имне дене могай пашаш колтеныт, тушко каеныт. 

Валентина ковай пеш поро, иктыланат осалым ыштен огыл. «Кладовщик улмем годым шуко еҥлан полшышым», - ойла шкеже.

1946 ийыште война гыч толшо Кузьма Демьянович Изибаев дене ешым погеныт. Вич ӱдырым ончен куштеныт, чылаштлан шинчымашым налаш полшеныт. Нылытше медицина пашаеҥ улыт, а Любовь Кузьминична ачажын корныжым тошкен, педагог пашам ойырен налын. Сулен налме канышыш лекмешкыже, Краснокам районысо Пураял школышто тыршен.

Тачысе кечын Валя ковай Кутерем селаште эн кугу Людмила ӱдыржӧ дене ила. Йолжым эмгатымек, шкетын илен ыш керт. Людмила Кузьминична - медицина пашаеҥ, пенсий марте Кутерем больницыште пашам ыштыш.

Валя ковайын кызыт 4 ӱдыржӧ (эн изижын - Лилиян - ош тӱня гыч кайымыжлан кум ий лиеш), 10 уныкаже, 6 кугезе уныкаже, 5 кугезе-кугезе уныкаже улыт. Ӱдыржӧ да уныкаже-влак Валя ковай дек толынак коштыт, огыт мондо.

Валя ковайлан эше шуко ий илаш тыланена, ушыжо пӱсӧ лийже, йолжат паремже.