Илышым илен лекташ - пасум вончымо гай огыл

Марфа Ташбулатовна 1931 ий 29 декабрьыште Мишкан районысо Корак ялыште шуко икшыван кресаньык ешеш шочын. Марфа - кудымшо икшыве. Изи ӱдыр кандаш тылзаш улмыж годымак ава деч посна кодын. Ачаже вес ӱдырамаш дене ешым чумырен, эше кок икшыве шочын. Тыге кум йоча пырля кушкын.

Сар тӱҥалме годым Марфа 10 ияш веле лийын гынат, кертмыж семын колхозлан полшаш тыршен. «Колхозышто паша шуко лийын, чыла кид дене ышташ логалын: мландым тырмаленна, пырчым нумалын ӱденна, мландым кольмо дене кӱнчен, пареҥгым шынденна, тӱредаш коштынна. Сар жапыште тунемаш пеш неле ыле. Пошкудышто илыше Соня лӱман йолташ ӱдырем дене торфышкат каяш шоненна ыле, но каен ышна шукто. Сар пытыме уверым пеш куанен вашлийна. Изижге-кугужге клубыш погынен, кугурак-влакын ойлымыштым куанен колыштна. Сар пытымекат, илыш куштылгак ыш лий. Шуко жапышкен тӱрлӧ пашам кид дене ышташ логале», - шарналтен каласкала Марфа Ташбулатовна.

Жап эртен… Марфа Ташбулатовнан илышыштыжат вашталтыш лийын. Тудо пошкудо Монар ялыш Сергей Имановлан марлан лектын. Колхозышто 34 ий дояркылан пашам ыштен. Доярке пашам куштылгылан шотлаш огеш лий. Группыштыжо 15 ушкал лийын. Ныл шагат эрдене кынел каен, 6 шагат марте чыла ушкалым кид дене лӱштен пытараш кӱлын. Ты жаплан кеҥежым кӱтӱм олыкыш пукшаш наҥгаеныт. Да эше кузе пашам ыштымым колхоз председатель терген коштын: кӧ кунам пашаш толын, мыняр шагатлан каен. Шӧрын нугыдылыкшымат эреак эскереныт. Телым силос лакым шкеак почыныт, диск дене руэн, силосым ушкаллан шупшыктеныт.

Паша кокла гычак сурт-оралтым уэмдаш тыршеныт, кок пӧртым чоҥеныт, икшыве-влакым кугемденыт. Варажым нунат авашт ден ачаштлан эҥертыш лийыныт.

Марфа Ташбулатовнам 4 икшывыже, 10  уныкаже, шуко кугезе уныкаже куандарат. Пелашыже ош тӱня дене чеверласен. Кызыт тудо Алексей эргыже да Элиза шешкыж дене ила, кертмыж семын нунылан изирак сомылым ышташ полышкала.

Пашам сайын ыштымыжлан «Паша ветеран» лӱмым пуэныт, Чап грамотыжат ятыр, тыгак «Победитель соцсоревнования», «За трудовую доблесть», «За доблестный труд в Великой Отечественной войне 1941-1945 гг.» медаль-влак да тӱрлӧ пӧлек дене палемденыт.

Чынак, Марфа Ташбулатовнан илыш корныжым лаштыклен лектын, тыге каласаш лиеш: «Илышым илен лекташ - пасум вончымо гай огыл. Нелыжат, сайжат, куанжат, шинчавӱдшат лийын, вет илыш - тиде нимучашдыме тасма, нигунам огеш керт ош лумла шулен».

Марфа Ташбулатовнам чапле юбилейже дене да шушаш У ий пайрем дене саламлена да тазалыкым, кужу ӱмырым, чолгалыкым тыланена.