Кӧлан кузе пӱрен…

Кажне еҥ шке илышыжым ила. Кӧлан тудым куштылгын эртараш пӱрен, а кӧлан дыр, ӱмыреш пашам ыштен, пенсийыш лекмым вучаш верештеш. Теве Аля кокаят ӱмыр мучко фермыште ушкалым лӱштен, пенсий марте кодмо кажне кечым, тылзым шотлен… Но илыш ончыко кая - вучыдымын пенсий нерген законым алмаштен шындышт. Аля кокайлан пенсий марте шукат кодын огыл ыле, а ынде кужашрак пашам ышташыже верештеш.

Икте-весым шукертсек ужын огынал ылят, ик поро кечын паша корныштыжо вашлийым. Аля кокай шӱлыкан шыже кастене вашкыде гына паша гыч пӧртылеш ыле. «Теве, - малдале, - илен шуна. Ушкал йымаланак йолым шуялташ логалеш докан. Саде депутатет-влак мемнан илыш дене модыш пӧрт дене модмо гай модын шинчат. Иктаж кугу тӧраже пенсий ийготыш тошкалын, но кайымыже шуын огылат, шонен луктын дыр! Мыйынат тугай пушкыдо кресло гыч кайымем ок шу ыле. Пенсийыш лектын, пӧртыштӧ шкетын мален кийымеш, еҥ коклаште нерен шинчем ыле. Да эше тидлан кугу оксам тӱлат гын, мо дене уда?! Мылам теве эше иктаж вич ий резинке кемым кудашаш огеш верешт», - пеш шыдешкен ойлыш да, кидшым рӱзалтен, шке корныж дене ошкыльо.

А Аля кока чыным ойла вет. Неле пашам ыштыше ӱдырамаш-влак кудло ий марте илен шуыт мо? Шуыт гынат, вараже изиш каналтен кертыт мо? Ала уремыш тоя кучен лектын шогалыт да малдалыт: «Олина, мыланна пашаш каяш жап шуын, но, калтак, кушто ыштымынам огына шарне вет. Айда урем мучко савырнена, ала паша вернам ушештарена?» Ӱмыр мучко пашам ыштен, поро тыныс илышым, пенсий оксам уждеак, илышышт эртен кая.

А. НИКОЛАЕВА.