Тек жап ӱпдам огеш чалемде!

1 октябрьыште тӱнямбалне Илалше-влакын кечыштым палемдат. Башкортостан Республикыште тачысе кечылан 1 миллион 800 тӱжем пенсионер шотлалтеш, тушеч 200-жӧ пашам ышта. Кундемыште тиде кече вашеш кугурак тукымлан тӱрлӧ благотворительный акцийым, концертым, экскурсийым, выставкым, каныш да вашлиймаш касым эртарат.

Тений 1 январь гыч республикыште илалше-влаклан 8-800-250-57-64 «шокшо линий» телефон пашам ышташ тӱҥалын. Тургыжландарыше йодышым рашемдаш, ой-каҥашым йодаш тыгак БР Еш, паша да калыкым социально аралыше министерствын почмо 8(347)218-06-87 да 8(347)286-21-73 «шокшо линий» телефон-влак дене йыҥгырташ лиеш.

Илалше-влакын кечышт вашеш республикын районлаштыже «Илыш, мый тыйым йӧратем!» фестиваль-влак эртат. 21 сентябрьыште Краснокам райрӱдӧ библиотекыште, мутлан, кугурак тукымлан «Озавате» конкурсым эртареныт. Тушто район гыч чумыргышо 55 ияш деч кугурак 13 пенсионер «Шыжын пӧлекше», «Супер когыльо» да моло конкурслаште мастарлыкыштым ончыктен. Краснокам районысо библиотека-влак пелен кугурак тукымлан таче кидпаша, поэзий, сад-пакча, кино дене кылдалтше да койыш-шоктышлан келшыше моло тӱрлӧ 32 клубный ушем пашам ышта.

Рустэм Хамитов, Башкортостан Республика Вуйлык:

«Пенсий ийготыш лишемше-влаклан полшаш кӱлеш. Башкортостан Республикыште пенсионер ден ветеран-влаклан улшо чыла льгото аралалт кодеш. 2019-ше ийыште тиде сомыллан 4,5-5 миллиард теҥгем ойыраш палемдыме. Тиде окса бюджетыште уло. 55 ияш деч кугурак ӱдырамаш да 60 ийым эртыше пӧръеҥ-влаклан улшо льгото-влак тугаяк кодыт».

Л. ГРИГОРЬЕВА.

Снимкыште: Мишкан районысо Ардаш ялын ковайже-влак.