«Чолманлан» - 35 ий: Ушен шогышо вий умбакыжат тӧр корно дене наҥгайыже

700 еҥым шыҥдарен кертше залыште вер ситыдымылан кӧра пайремышкына логал кертдыме-влаклан нелеш ида нал манме шуэш (Билетым концерт деч ик арня ончычак налын пытареныт). А толшо-влакым сайынак куандараш тыршышна, тидлан шкенан республикысе районла да тыгак Марий Эл, Удмуртий гыч толшо поро кумылан, марий шӱлышан артист йолташна-влак моткоч устан полшышт. Тиде «Шӱдыргорно» мурышо ансамбль (Нефтекамск ола), «Мир танца» куштышо, «Яндар йӱк» мурышо ансамбль-влак (Коян села, Краснокам район), «Марий кас» куштышо ансамбль (Бирск ола), «Ныргындыш сем» фольклор ансамбль (Карагӧл район, Удмуртий), «Элегия» мурышо да «Юл сем» семӱзгар ансамбль-влак (Волжск район, Марий Эл), «Ош Виче сем» фольклор ансамбль (Анач ял, Илиш район), «Ший памаш» фольклор ансамбль (Памаш ял, Бирск район), мурызо-влак Ирина Файрушина (Бажан села, Бирск район), Мария Мурзагареева, Елена Иванова (Нефтекамск ола), Зоя Баязова (Тынбай ял, Мишкан район), гармоньчо Борис Айгузин (Ардаш ял, Мишкан район). Газетнан йолташыже шуко улмо мемнанат кумылнам нӧлтале, тугеже, тудын ӱмыржӧ кужу лиеш, лудшына огеш шагалем.

«Башкортостан Республика» савыктыш пӧрт акционер ушемын генеральный директоржо З.М. Рахматуллина, артист-влакын да залысе калыкын ташлен шарлыше йогын семын пырля пайремлымыштым ужын, саламлымыж годым ӧрмыжым шылтыде ойлыш, «Чолман» газетым иктыш ушен моштышо вий семын палемдыш. Нефтекамск ола администрацийын увер да аналитик пӧлкажым вуйлатыше Г.Р. Ахиярова умбакыжат газет шке корныжым тыгак талын шуйыжо манын тыланыш, Калтаса район администраций вуйлатышын алмаштышыже Ф.Н. Гафарова редакций пашаеҥ-влакым, марий пайремыш чумыргышо калыкым (Татар ден руш-влакат толыныт.) шокшын саламлыш, а Краснокам районысо Образований пӧлкам вуйлатыше А.В. Крылов тусо администраций вуйлатыше А.А. Горбачевын лӱмжӧ дене поро тыланымашым ойлыш. Бирск район больницын хирургий пӧлкажым вуйлатыше Д.И. Ибашев тыгай усталык касым тарватыше «Чолман» газетын марий калыкын мер да тӱвыра илышыштыже кугу рольым модмыжым палемдыш. Шаран марий-влакын шокшо саламыштым мемнан чолга авторна Г.Е. Ахметшина поро кумылын ойлыш. Концерт тӱҥалме деч ончыч подпискым ыштыше лудшо-влаклан пӧлек модмашым эртарышна. Лӱмынак ты пайремыш мотор деч мотор у марий тувырым чиен толшо-влак пеш шукын ыльыч, нунын кокла гыч кумытшылан кумылаҥдыше пӧлекна логале.

«Башкортостан Республика» савыктыш пӧртын вуйлатышыже З.М. Рахматуллина, «Чолман» газет редакцийлан ноутбукым пӧлеклышыла, пашаеҥже-влак Э.В. Губаева ден Л.Г. Шавалиевалан Чап грамотым, а внештатный авторна-влак Г.Е. Ахметшина (Акпарс, Шаран район) ден Г.П. Айтиевлан (Маняк, Краснокам район) тауштымо серышым кучыктыш. Лудшо-влакым куандарен возен шогышо моло чолга авторна-влак Александр Изиляевым (Кугу Соказа, Мишкан район), Надежда Минаевам (Тынбай, Мишкан район), Татьяна Ирбулатовам (Тӧргымдӱр, Мишкан район), Валерий Галеевым (Искуш, Дӧртыльӧ район), Эльбира Калимьяновам, Марина Япаровам (Кужнур, Бирск район) газет редакцийын тауштымо серышыже да пӧлек дене палемдаш пеш кумылло ыле.

Тау чылаштлан, а районла да Нефтекамск ола гыч саламлаш толшо тӧра-влакын залыште мурен-куштен веселитлымашке ушнымышт да мучаш марте пырля лиймышт, чынак, газетнан усталык касше пеш оҥайын эртымым ончыкта да ончыкылыклан ӱшаным шочыкта.