Мишкан - финн-угор тӱнян тӱвыра рӱдерже

У идалык тӱҥалтышыште, 6 январьыште, Мишкан селаште финн-угор тӱнян тӱвыра рӱдержым почмылан лӱмлымӧ кугу пайрем эртыш. Тушко мемнан республикысе тӱрлӧ районлаште да Марий Эл, Татарстан, Удмуртий Республикылаште илыше финн-угор: марий, удмурт, мордва - калык-влакын делегацийышт чумыргеныт ыле.Районысо тӱвыра полат эр гычак мӱкшомарта гӱжлымыла чучо. Оза-влак палемдыме жаплан миен шушо кажне делегацийым кинде-шинчал, тальянка да тӱмыр дене шокталтен-муралтен вашлийыч. Ик жап гыч тӱрлӧ кундем гыч улмым шижтарыше, ойыртемалтше вургеман коллектив-влак фойеш чумыргышт да пырля марла тывырдык йогыныш ушнышт.

Латик шагатеш районысо тӱвыра полатыште пайремын тӱҥ ужашыже тӱҥале. Мишкан районын кузе шочмыжым модын ончыктымо сӱрет деч вара уна-влакым да мероприятийыш погынышо калыкым Мишкан район администраций вуйлатыше Павел Трапезников, РФ Кугыжаныш Думын депутатше, Российысе Паралимпийский комитетын вице-президентше Рима Баталова, республикысе тӱвыра министрын алмаштышыже Наталья Лапшина, Калык-влак келшымаш пӧртын директоржо Ильгиз Султанмуратов саламлышт. «Тыгай лӱмым сулен налмаш - районлан моткоч кугу событий, - каласыш Н.М. Лапшина. - Те ик идалыклан «рӱдолаште» илыше лийыда. Шке йӱладам, тӱвырадам ончыкташ шуко амал лектеш. Тений эртышаш Тӱнямбал фольклориадышкат ушнышаш улыда».

Марий Эл гыч толшо делегацийым вуйлатыше, Марий тӱвыра рӱдер вуйлыкын алмаштышыже Василий Петров тӱвыра, печать да калык-влакын пашашт шотышто министр Константин Ивановын лӱмжӧ дене форумыш погынышо-влакым шокшын саламлыш. Кодший финн-угор тӱнян тӱвыра рӱдерже лийше Морко районысо Унчо (Шоруньжа) ялсовет вуйлатыше Иван Евсеев Мишкан селам вуйлатыше Рустам Ишмакаевлан тӱвыра рӱдерын тӱҥ символжым - пу гыч ыштыме кайыкым - кучыктыш. А мишкан-влак вашеш шке кундемыштын символжым - чапаж дене ты кайыкым ӧндалше маскам - пӧлеклышт.

2014-ше ийыште икымше гана финн-угор тӱнян тӱвыра рӱдерже лӱмым нумалше Тошто Быги ял гыч (Удмуртий Республикысе Шаркан район) толшо делегацийым вуйлатыше, «Быгы» удмурт тӱвыра рӱдер директор Жанна Ермолаеван да Эстоний гыч толшо унан - «Обиница - финн-угор тӱнян тӱвыра рӱдерже» проектым вуйлатыше, сету ӱдырамаш Риека Хырнын выступленийышт поснак оҥай ыле. Нуно шке йылмышт дене кугезышт деч аралалт кодшо мурымат муралтышт.

Тӱҥ суапле сомылым шуктымо деч вара уна да делегаций-влакын еҥышт илышыште да пашаште лекше кӱлешан йодышлам каҥашышт.

Кас велеш район тӱвыра полатыште Мишкан, Балтач, Бурай, Бирск, Калтаса, Караидель, Краснокам, Нуриман, Татышле, Федоровка районла да Нефтекамск ола гыч мийыше коллектив-влак сылне концертым ончыктышт. Тыгодым делегаций-влак Мишкан районысо Озерка, Йылыш, Кӱрзе, Ирсай, Монар яллаш тарванышт. Тушто уна-влакым марий койыш-шоктыш да йӱла-влак дене палдареныт, калыкнан идалык тӱҥалтыште эртарыме Шорыкйол пайремжым ончыктеныт. Тиде кече этнодискотека дене мучашлалтын.

«Финн-угор тӱнян тӱвыра рӱдерже» проектым Финн-угор самырык-влакын ассоциацийыштын (МАФУН-ын) да Тӱп калык-влаклан вияҥаш полшышо URALIC рӱдерын ойышт дене 2013 ийыште илышыш шыҥдараш тӱҥалме. Эн ончыч, 2014 ийыште, тӱвыра рӱдер лӱмым Удмуртийысе Быги, вара Эстонийысе Обиница ял-влак, Венгрийысе Искасентдьерд ял да Веспрем ола, Карелийысе Вокнаволок, Марий Элысе Унчо ял-влак суленыт.

Мемнан республикысе Мишкан села ик идалык финн-угор тӱнян тӱвыра рӱдержылан шотлалташ тӱҥалеш. Тушто тӱнямбал, регион-влак кокласе да верысе кӱкшытан 12 кугу мероприятийым эртараш палемдыме. Нунын радамыш Ӱярня, Кугече, Семык йӱла пайрем-влакым, моторлык да патыр-влакын, самырык эстрада мурызо-влакын конкурсыштым, Пеледыш пайремым да шуко моло сомылым пуртымо. Чумыр ончымаште, тиде Мишкан районлан гына огыл, республикыштына илыше чыла финн-угор калыклан кугу событий, моло-влакымат шке тӱвырашт дене палдараш да тудым вияҥдаш, эл да тӱнямбал кӱкшытыштӧ калыкнан да кундемнан лӱмжым кӱшкырак нӧлтал колташ сай йӧн. Пашада тӱвыргӧ, чапле лектышан лийже, мишкан-влак!

Моло фотом тыште ончыза.

Р.Никоновын фотожо-влак.

(остальные фото можно посмотреть по ссылке)

Читайте нас:

Новости партнеров

Был стипендия кемдәргә түләнә?

На уровне молекул

Азык-төлеккә талон системасы кертелергә мөмкин

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».