Студент-влак ИФУСКО-ш миеныт

Тений ИФУСКО Тарту олаште (Эстоний) эртыш. Тушко мыланемат мияш пиал шыргыжале. Конференций 1-ше гыч 5-ше май марте шуйныш. Кушкыжмын участник-влаклан Тарту ола мучко экскурсийым эртарышт. Тарту деч моторрак да арурак олам эше ужын омыл ыле. Кажне архитектур памятникын историйжым умылаш тыршен колыштым, поснак Ратушный площадьыште верланыше «Шупшалалтше студент-влак» ӧрыктарышт.

Эрлашыжым конференций почылто. Тарту университетын тунемме паша шотышто проректоржо профессор Аннели Саро, финн-угор шымлымаш паша пӧлкан вуйлатышыже профессор Герсон Кламп да наций-влак кокласе кыл шотышто эксперт Дмитрий Харакка-Зайцев студент-влакым саламлышт да лектышан пашам тыланышт. Тиддеч вара тӱрлӧ секций шке пашажым тӱҥале: лингвистика, литература, историй, фольклористика, культура, общество да СМИ, образований. Кажне участник шке пашаж дене выступленийым: тезисым, докладым, презентацийым - тӱрлӧ йылме дене ямдылышаш ыле. Тидыжым икте-весым умылаш лийже манын ыштыме. Мый кажне секцийысе выступленийым колышташ тыршышым, чылажат пеш келгын шымлыме да оҥай ыльыч. Джереми Бредлин «Урал дистанционный тунеммаш таче да эрла» докладшым посна ойырен кодымо шуэш. Джереми Бредли шкеже американец улеш, кызыт Австрийыште ила, Вена университет дене кылым куча, марий йылмым тунемеш. Докладшым марла ыштыш, тунемшыже англичан йылмыш кусарыш, а презентацийыштыже марий йылмым тунеммаште полшен кертше интернет ресурс-влакым ончыктыш. Марий йылмым йот эллаште илыше-влакат тунемыт улмаш!

Кастене тӱвыра мероприятийым эртарышт. Марий, удмурт, финн, эстон, венгр, коми, эрзя да моло студент-влак шке калыкышт дене палдарышт. Пошкырт кундем гыч мый шкетын ыльым гынат, Марий кугыжаныш университет гыч мийыше Надежда Имаева, Елена Ласточкина да Тартушто вашлийме у палымем-влак Инга Погодина, Аня Мишина дене пырля марий калыкын культура ойыртемжым ончыктышна. Калтаса вел такмак-влак почеш «Кандырам» пунышна. Джереми Бредлин командыже «Йӱржӧ йӱреш» мурым ямдылен улмаш, мемнамат пырля муралташ ӱжыч.

Кок кече оҥайын эртен кайыш. Кугарнян конференцийна петыралте. Кажне участниклан сертификатым кучыктышт. Тыштак XXXV ИФУСКО кушто эртышашым увертарышт. Вес ий тудым Вена ола вашлиеш, мероприятийым Джереми Бредлин командыже ямдылаш тӱҥалеш.

Конференцийым официально петырышт гынат, Тарту ола дене чеверласаш ышна вашке - мемнам Эстон калык музейыш ӱжыч. А шуматкечын, кок тӱшкалан шелалтын, Вырумаа да Чудской ерла дек экскурсийыш мийышна.

Конференцийын организа-торжо-влак Анна Кузнецовалан, Мерит Мюллерлан, Кармен Нӧлваклан, оҥай экскурсийлам эртарыше Татьяна Алыбиналан да Анти Лиллаклан, конференцийыш каяш таратыше, полшен шогышо шанче вуйлатышем С.И. Апсатаровалан кугу таум каласыме шуэш.

М. МИНИЛБАЕВА, Башкир кугыжаныш университетын Пӱрӧ филиалжын студентше.

Снимкыште: Тарту университет ончылно.