Погылан налогым тӱлымӧ нерген

Южгунам кагазеш лукмо налоговый уведомлений-влак огыт тол. Ынде тудым налог служба утларакшым электрон йӧн дене колтылеш. Lkfl2.nalog.ru сайтыште налогоплательщик семын личный кабинетда уло гын, уведомленийым тушан вераҥдат. Счетым туштак комиссий деч посна тӱлаш лиеш. Але, бланкым кагазыш луктын, кеч-могай вес йӧн дене тӱлен кертыда. Квитанцийым Россий почтын пӧлкаштыжат налаш лиеш. 

Налогын кугытшо айдемын ийготшо деч ок шого. Йоча пачерын але тудын ужашыжын озажлан шотлалтеш гын, тудланат счет толеш. Тудым ава-ачаже але опекунжо-влак тӱлышаш улыт. 

Погылан мыняр налогым тӱлышашым налог служба чыла шке шотла. Тыланда чумыр кугытшо да тӱлашлан код веле толыт. Но налогын кугытшо кузе чумыргымым да мо-кузежым садак палыман. 

Транспорт налогым тыгай тӱшкаш пурышо еҥ-влак огыт тӱлӧ: Совет Ушемын да Российын, Социалистический Пашан Геройжо, Чап орденын да Паша Чап орденын тичмаш кавалерже, инвалид, Кугу Ачамланде сарын да моло эллаште лийше боевой действийын, военный службын ветеранже, паша ветеран, «чернобылец», шуко икшыван, тыгак инвалид икшывым ончышо еш, электрокарын озаже-влак, специальный военный операцийын (СВО) участникше-влак да нунын ешышт. Газ дене пашам ыштыше машинан озаже-влаклан 50 процент скидка лийшаш. 

Мландылан, пачерлан, пӧртлан налогын акше нунын кадастр акышт деч процент семын шотлалтеш. Тыште  районын йӧнан  улмыжым, пачерын мынярымше пачашыште верланымыжым, зданий тошто але у улмым да молымат шотыш налыт. Садлан ола покшелсе тошто «хрущевкын» да ола тӱрысӧ пачерын налог акышт икте-весе деч ойыртемалтеш. 

Тыгак кажне олан да районын шке ставкышт, тӱрлӧ льготышт уло. Тичмаш уверым www/nalog.gov.ru/rn02/service/tax/ ссылка почеш палаш лиеш. «Налоговый период» пӧлкаште 2021 ийым ойырыман.

Пого дене ода пайдалане гын (мутлан, пӧрт пожарыш логалын але машинам шолыштыныт але кычалмаште улеш), налогым тӱлыман огыл.

Подъезд да пӧрт воктенсе мланде - тиде чумыр собственность. Тидын шотышто законышто тыге палемдыме: шуко пачеран пӧртлаште чумыр пӧртын погыжлан (общедомовое имущество) налогым тӱлыман огыл. 

1 декабрь деч вара парымын кугытышкыжо процент-влакым шотлаш тӱҥалыт - кечеш парымын чумыр кугытшо деч 0,025%. Тыгай годым налоговый служба уведомленийым колта. Тушто парымын, пенин кугытшым палемдыме лиеш. Палемдыме жапыште тӱлыдымылан штраф (парымын кугытшо деч 20 процент) ешаралтеш.