Корнылаште камер-влакым ешарат

Кум пачаш шукырак 

2019 ийыште корнылаште 540 камер лийын гын, 2020 ийыште нунын чотышт 1015-ыш шуын, а кызыт 2000 камер шотлалтеш. Камер-влакым, ГИБДД орган пашаеҥ-влак дене кутырен каҥашен, аварий шуко лийме участкылаште вераҥдат. Ончыч шийвундо кугу олала ден райрӱдӧ-влаклан гына ситен гын, пытартыш ийлаште республикын муниципалитетлаштыжат камер-влакын чотышт кок пачаш шукемын. 

Мутлан, Уфа-Бирск-Янаул корно ик эн лӱдыкшылан шотлалтын - идалык тӱҥалтыш годсек тушто 15 еҥын ӱмыржӧ кӱрылтын. Расследований ончыктен: тиде корнышто ДТП утларакшым скоростной режимым кугемдыме да ваштареш полосаш лекмылан кӧра лиеш. Кызыт палемдыме трассыште скоростьым иземдаш шӱдышӧ знак-влакым вераҥдат, эртен кудалаш чарыме верлаште ваштареш полосаш лекмым возышо камер-влакым пижыктат. Лишыл жапыште корныеҥ вончымо вер-влакым, освещенийым оборудоватлат. Ваштареш полосаш лекмылан кум арняште камер-влак полшымо дене 91 штрафым, скоростьым кугемдымылан 851 штрафым пыштеныт. 

Ий еда «ушанрак» лийыт

Ончыч камер-влак скоростьым гына фиксироватлен, номерым рашемден да водитель-влаклан штраф нерген уведомлений ден фотокартычкым веле «колтен» моштеныт. 10 август гыч камер-влакым саемденыт, вестӱрлемденыт: ынде нуно водитель але пассажир ременьым пижыктыдымым (штраф - 1000 теҥге) але водитель телефон дене мутланымым (штраф - 1500 теҥге) эскерен кертыт. Уфаште 90% камерын тыгай функцийже уло. Эше кызытсе камер-влакым ик чумыр сетьыш чумырымо, нейросетьыш ушымо да шуко тӱрлӧ функций дене йӧнештарыме. Мутлан, нуно транспортын кугыжаныш номержым, маркыжым, модельжым, тӱсшым ужын, палемдыме жапыште мыняр да могай машина кудал эртымым пален кертыт. Тыгак нуно эртен кайыше еҥ-влакын кап-кыл температурыштым дистанционно висен да кӧн кӱкшӧ улмым пален налын, а эше, шӱргын ужашыжым маска але капюшон дене авырыме гынат, айдемым пален, фото почеш кычалын (шуко еҥ коклаште улеш гынат), кушко кайымыжым эскерен кертыт.

Кушто верланымышт секрет огыл 

Интернетыште корнылаште камер-влакым кушан вераҥдымым палаш полшышо программе-влакым оксала налаш темлыше-влак толын лектыныт. Тидлан ӱшаныме ок кӱл: тыште нимогай секрет уке. Кажне пунктын кушто верланымыжым республикысе Корно движений шотышто организацийын сайтыштыже (coddrb.ru/kam/index.html) ончалаш лиеш. Тушто, шке маршрутым муын, корнышто камер кушто вераҥмым веле рашемдыман. Шарныман: камер-влак таче ик верыште улыт гын, эрла вес вере куснен кертыт. Чыла вашталтышым картыш пуртат. 

Камер-влакым корнылаште оксам погаш огыл,  а аварий ден травматизмым шагалемдаш, еҥ-влакын илышыштым арален кодаш, водитель-влакын дисциплиныштым саемдаш вераҥдат. Корнылаште камер-влак скоростной режимым эскераш да правил-влакым шукташ таратыше ик эн эффективный ошкыллан шотлалтыт. 

Ик чумыр план лиеш

Конешне, корнылаште чылажат камер деч гына ок шого. Тыште асфальтын качествыже, трассым волгалтарымаш да кӱлеш верлаште знак-влакын шагал улмышт, вес еҥын илышыжым аклыдымат изи огыл верым налыт. Кажне арнян ГИБДД пашаеҥ-влак шӱдӧ наре йӱшӧ водительым кучат. А мыняржым огыт верешт? Тидын шотышто ик погынымашыште Башкортостан Вуйлык Радий Хабиров идалык мучаш марте корныласе лӱдыкшыдымылык йодышым саемдыше программым ышташ шӱден.

Уфаште «пробка» ден аварий-влакым шагалемдаш йӧным ыштыше кок вашталтышым илышыш шыҥдарат. Икымшыже - «вафельный разметка» (перекресткын перпендикуляр потокыш лекташ чарыше участокшо). Правилым пудыртымылан штрафын кугытшо - 1000 теҥге. Август мучаш марте тудым 21 перекресткышто йӧнештарат. 

Кокымшыжо - рӱдоласе 9 перекресткышто стоп-линий-влакым сӱретлат. Тугодым водитель светофорын саре але йошкар тулжо чӱкталтме годым ош линий але «Движение без остановки запрещено» знак ончылно ок чарналте гын, тудлан штраф толеш.  

«Башкортостан Республика» Издательский пӧрт гыч колтымо материал негызеш Л. Шавалиева ямдылен.