Кеҥежым пожар деч шекланыза

Кеҥеж да шокшо игече толмо дене сурт озанлыкыште пожар лийын кертме лӱдыкшӧ ешаралтеш. Республикысе чрезвычайный ситуаций шотышто кугыжаныш комитетын пашаеҥже-влак пожар лӱдыкшым чактарашлан тӱткӧ лияш шӱдат да нине каҥаш-влакым шотыш налаш темлат.

Тачысе кечын кевытыште сай качестван электроприборым налаш утыжым кугу шийвундым тӱлымӧ ок кӱл. Шулдырак акланат сай электроприборым налаш лиеш. Кеҥежым нуным кевытлаште сай скидка денат ужалат. Шке ыштыме обогреватель дене пайдаланыме деч кораҥаш тыршыза. Нунын ток перыме, утыждене ырыме, замыканий деч аралыше устройствышт уке. Электроприборын тӱз улмыжым эре тергыман да эскерыман. Южо ешыште икмыняр телевизор, планшет, телефон дене пайдаланат. Тыгодым электросетьлан кугу нелыт логалеш. Телефонлан зарядым пуышо шнурымат эре тергыман - тусо изи экшыкат пожарлан амалым ыштен кертеш. Суртым коден кайыме годым йӧрташ лийме электроприборым, зарядкым, телевизорым да молым розетке гыч луктын кодыза, пӧртысӧ, мончасе коҥгам уэш ончал лекса.

Потолокыш пижыктыме пожарный извещатель шуко еҥын илышыжым арален коден. Тудым шагал парышан да шуко икшыван, социально лӱдыкшӧ ситуацийыште улшо еш, Кугу Ачамланде сарын ветеранже, шкет илыше да 55 ийым эртыше еҥ-влаклан, тыгак ешыште икшыве шочмо годым тугок пуат. «Шикшым шижше датчик» манме приборым кевытыште шкат налаш лиеш. Жапын-жапын батарейкыжым вашталташ мондыман огыл.

Кеҥежым калык шашлыкым ямдылаш кумылан. Тыштат лӱдыкшӧ лийын кертме нерген шарныман. Йӱлышӧ тулым да тулшолгымым ик татланат коден кайыман огыл. Мангал ден барбекюм пушеҥге йымалне, лышташан мландеш вераҥдыман огыл. Тулым ылыжтыме жидкость эре петырыме да тулото деч ӧрдыжтӧ лийшаш, вет тудо моткоч писын ылыжеш. Шырпым, шикшланыше тамакым калай атыште кучыман да тушко вӱдым пыштыман. Кудывечыште газ баллоным, бензиным, спиртым, ацетоным да моло йӱлышӧ веществам темыме атым кучыман огыл.

Шӱкым йӱлатымаш - моткоч лӱдыкшӧ сомыл. Кукшо да мардежан игечыште тул йырваш писын шарла. Садлан куштырам калай печкеште йӱлатыман. Тыгодым воктенсе печкеште вӱдым але ошмам темыман вес кугу калай ате шогышаш. Сурт пелен порошокан универсальный огнетушительым кучаш ок мешае. Тудын дене йӱлышӧ пырдыжымат, тул пижме компьютерымат, электроплиткымат, чайникымат йӧрташ лиеш.

Шотыш налза:

- Кухньысо шовычыш тул пижын гын, раковиныш кудалтен, вӱдым опталза але писын каструль петыртыш дене темдалза;

- Cалмаште ӱй ылыжаш тӱҥалын? Петыртыш дене леведса да газ плитам йӧртыза. Вӱдым шыжыктыме ок кӱл - когаргаш лиеш.

- Пачерыште йӱлышӧ изоляций пуш лектын - тӱҥ электровыключательым йӧртыза. Йоча-влакланат тудын кушто верланымыжым ончыктыза.

- Ведрасе шӱк але почта яшлыкыште газет-влак йӱлат гын, тулым вӱдым конден йӧртыза.

- Бытовой техника ылыжын гын, шнурым розетке гыч луктын, электроприборым йӧртыза, приборым одеял але кӱжгӧ тасма дене южым кодыде леведса.

- 112 номер дене аралыше службыш йыҥгыртыза.

Пӱртӱс лоҥгаш

лекме годым

Тений элысе чумыр ситуацийлан кӧра ятыр еҥ каныш кечылаште, отпускышто пӱртӱс лоҥгаш лекташ вашка. Тушто, тулотым ылыжтенда гын, йӧртен кодыман, тамак окуркымат шудыш кудалтен кодымо ок кӱл.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Об использовании персональных данных

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».