БЕСПИЛОТНИК-ВЛАК ДЕНЕ КУЧЕДАЛШЕ ОТРЯДЫШ КУЗЕ ЛОГАЛАШ?

1. Тиде могай отряд?

Республикыште Элын боевой армейский резервшын подразделенийышкыже (БАРС) еҥ-влакым погаш тӱҥалыныт. Тудо гражданский объект ден предприятий-влакым пилотдымо юж аппарат-влак деч арала. Контрактын ойыртемже тыгай - пӧръеҥ-влак шке тӱҥ пашаштым ыштыме жапыштак тренировкыш да ий еда военный сборыш коштыт. Российыште тыгай резервист-влак 2015-ше ий годсек улыт, а СВО тӱҥалмылан кӧра нунын пашашт поснак кӱлешаныш савырнен.

2. Кандидат-влак могай лийшаш улыт?

Резервыш индеш класс деч шагал огыл тунем пытарыше, кызыт запасыште улшо-влакым налыт. Нуно икмыняр критерийлан келшышаш улыт.

Икымше, прапорщик, сержант да салтак-влак 52, изирак офицер-влак 57, кугурак офицер-влак 62 ийым темыдыме лийшаш улыт. 

Кокымшо, тазалык шот дене военный службылан йӧрышӧ лийман (А, Б але В категорий).

Кумшо, нуным психолог ойырен налшаш.

Нылымше, петырымаште шинчыше, наркотик але психотропный вещества дене пайдаланымылан административный наказанийым налше, нунын шотышто титаклыме приговорым лукмо, дознанийым, ончылгоч следствийым эртарыме але уголовный пашаштым судыш колтымо граждан-влакым БАРС-ыш огыт нал.

Тидлан запасник, предприятий пашаеҥ, дружинник, мер организаций-влакын еҥышт, ончыч силовой структурлаште пашам ыштыше-влак утларак келшат.

3. Мыняр тӱлат, могай льготышт лиеш?

• У контрактым ыштыме годым ик гана 2967 гыч 10974 теҥге марте (званий деч шога) тӱлат.
• Тылзе еда 2967 гыч 7316 теҥге марте (званий деч шога) тӱлаш тӱҥалыт.
• Посна сборым эртарыме годым 24720 гыч 60967 теҥге марте довольствийым (званий деч шога) да кажне кечыжлан 2 тӱжем теҥге дене тӱлат. Тӱҥ паша верыштат пашадар аралалт кодеш. Южо ТЭК компаний-влакын контрактым ыштыше пашаеҥыштым моло семынат кумылаҥдыме йӧнышт уло, мутлан, волтен возымо кажне дронлан 75 тӱжем теҥгем тӱлат.
• Ятыр социальный льготым ыштыме. Тиде илышым страховатлымаш, тугок эм, 1,5 ийым темыше икшыве-влаклан черет деч посна йочасадыш направленийым пуымаш, кружоклаш да ешартыш образований организацийлаш тугок кондыштараш йӧным ыштымаш, йочам лишылрак йочасадыш кусарымаш, йочасадыш оксам тӱлыде кондыштарымаш да молат. 
• Мобилизационный резервыш возалтше еҥ-влак мобилизацийыш огыт логал.

4. Кушко йодын мийыман?

1) Эн ончыч воинский учетышто шогымо военный комиссариатын пӧлкашкыже мийыман.

2) Документым пуыман (5 пунктым ончо).

3) Медкомиссийым эртыман.

4) Резервист пеҥгыдем-дыме воинский частьыштыже аттестацийым эртышаш.

5) Кум але вич ийлан контрактым подписатлыман.

5. Могай документ-влак кӱлыт?

Кандидатын пеленже икмыняр документше лийшаш:

• паспортын, военный билетын, шочмо кагазын, мужыраҥме нерген свидетельствын да икшыве-влакын шочмо кагазыштын (улыт гын), образований нерген документын, паша книжкан копийышт;
• анфас возалтме 9х12 см фотографий (шеҥгеланже фамилийым, лӱмым, ачалӱмым да кунам возалтмым серыман);
• кок экземпляр автобиографий, иктыжым шке кид дене возыман;
• пытартыш паша (тунемме, служитлыме) вер гыч служебный характеристика;
• возымо анкета (бланкшым военный комиссариатыште пуат).