+15 °С
Облачно
СВО-со шкенан-влаклан полшена
1 Июля , 07:05
Фестиваль ончыкылык пашалан у вийым ешарыш
Июнь мучаште Альшей районышто «Сила земли» патриотизм шӱлышан визымше этнокультурный фестиваль эртыш. Мероприятийыш еҥ-влак уло республика гыч миеныт ыле - тудо СВО-н сарзыже-влакым да нунын ешыштым, волонтер-влакым иктыш чумырен. Фестивальыште Новосепяшево села воктенсе Сабантуй олыкышто тӱрлӧ площадка пашам ыштен. «Сила земли» проектын авторжо - «Защитники Отечества» кугыжаныш фондын Башкортостан Республикысе филиалжым, тыгак «Россий калык-влакын Ассамблейышт» мер органазацийын Башкортостан Республикысе пӧлкажым вуйлатыше Гульнур Кульсарина.
Г.Г. Кульсарина (покшелне) да фестивальыш тӱрлӧ районла гыч чумыргышо волонтер-влак. Авторын колтымо фото-влак.
Фестивальыште тарватыме йодыш-влак тӱҥ шотышто СВО-н сарзыже-влаклан да нунын ешыштлан полышым пуымо сомыл дене кылдалтыныт ыле. Медицина пашаеҥ, психолог, юрист-влак СВО-н участникше да нунын ешыштлан тӱрлӧ полышым пуэныт, кумылан-влак калык эмлызе-влак декат логал кертыныт. Мероприятийыште тӱрлӧ выставка пашам ыштен, мастер-классым да спорт таҥасымаш-влакым эртареныт. Кугу сценыште СВО-што вуйым пыштыше рвезе-влакын ава-ачаштлан наградым кучыктеныт, СВО-н ветеранже-влакым саламленыт. Калыкым артист да пошкырт, руш, марий, чуваш, татар коллектив-влак мурымаш-куштымаш дене куандареныт.
Шаран район гыч фестивальыште 12 еҥан делегаций пашам ыштен. Тошто Кичкиняш ял гыч Виталий Саитовым «Отец защитника Отечества» медаль дене суапландареныт. Марий пӧръеҥ СВО-што геройла вуйым пыштыше Евгений Саитовын ачаже улеш. СВО-н ветеранже-влак Ф.А. Асмеевлан да В.Т. Миннигалиевлан «Защитники Отечества» кугыжаныш фондын Башкортостанысе пӧлкажын таумутан серышыжым кучыктышт.
Шаран районысо волонтер клуб-влакын чолга еҥышт СВО-лан гуманитарный полышым ямдылыме пашашт дене палдарат.
Фестивальыште тений икымше гана «Всё для Победы!» волонтер-влакын республикысе форумыштым эртарышт. Тушто волонтер-влакын 50 наре клубышт чапле выставкым ямдыленыт. Нуно икте-весыштым паша опытышт дене палдареныт, тӱрлӧ мастер-классым эртареныт. Тудо кечынак фестивальыште СВО-н участникше-влаклан гуманитарный полышым погымо пашам шуктеныт. Тиде сомылыш форумыш мийыше чыла волонтер клуб ушнен. Шаран районышто специальный военный операцийлан полшымо паша дене Дмитриева Поляна ялын «Узелок Победы» да Акпарс ялын «Акпарс» волонтер клубышт-влак палдареныт. Гуманитарный полышым погымаште, тыгак фестивальым ямдылымаште тыршымыштлан нунымат таумутан кагаз дене палемденыт.
Тиде мероприятий СВО-н участникше-влаклан гына огыл, тыглай еҥ-влакланат пайдале. СВО-н сарзыже да волонтер-влак дене вашлийын, нунын дене мутланен, умылена: Шочмо элым аралыме суапле сомылыш кажне еҥ ушнен, вийжым пыштен кертеш.
«Сила земли» - пеш кӱлешан, ончыкылык пашалан вийым пуышо фестиваль. Тушко Пошкырт мландыште илыше тӱрлӧ калык икоян да пырля улмынам ончыкташ чумырга, тушеч сеҥымашым лишемдаш у вийым налын пӧртылеш.
