«Авай, ме элым аралаш шочынна»

Тиде гана СВО гыч отпускыш толшо рвезым ужаш Шараныш мийышна. Самырык салтак мемнам кудывечыш вашлияш лекте. Кухньо гыч пареҥге когыльын тамле пушыжо нерыш пурыш. Тиде Иванын аваже эргыжым тутло кочкыш дене сийлаш ямдылалтын улмаш.

И.А. Ибяев (снимкыште) Акпарс ялеш шочын. Шаран селасе кокымшо школышто 9 классым пытарымек, Октябрьский оласе коммунально-строительный колледжыште автокрановщиклан тунем лектын. Армийыште мотострелковый войскаш логалын. Ик тылзе гыч присягым приниматлыме деч вара СВО-ш каяш шке кумылын контрактым подписатлен. Рвезым ДНР-ыш штурмовой отрядыш, минометный взводыш колтеныт. 

Специальный военный операцийыште тӱрлӧ ийготан салтак-шамыч улыт.

 - Самырык рвезе да илышым ужшо пӧръеҥ-влак коклаште ойыртем шижалтеш мо? - йодым Иван деч.

- Кеч-могай еҥ, иктаж-сомылым ыштен ончымеке, тудым сайын шукташ тунемеш. Элыштына курымла дене ты закон почеш илат, садлан СВО-штат тиде шижалтеш. Тыгодым айдемын ийготшым шотыш налман огыл. Шонен моштет, кид-йолет пашам ышта гын, чылалан тунемат: тушман ваштарешат кредалат. Чыным каласаш гын, ялыште шочын-кушшо-влак чытыше улыт. Нунын кид-йолыштат чыла пашалан толеш, уш-акылышт виян, кеч-могай ситуацийыштат вашке шотым муын моштат, - вашештыш тудо.

Иванын аваже, Ксения Сергеевна, эргыже пӧртылмылан чот куанен. Ончыч Андриян пелашыже СВО-ш каен, ынде Иван эргыже тушто. Ты жап гыч ӱдырамашын чоныштыжо ласкалык йомын…

- Ешыштына кок ӱдыр да кок эрге кушкыт. Иван - эн кугу икшывына, эн изижлан - кок ий веле. Андриян пелашем 2024 ийыште, контрактым подписатлен, СВО-ш каен. Кредалмаште нелын сусырген, ӱмаште отпускыш толын ыле. Теве ынде 10 тылзе годсек туддеч нимогай увер уке. Андриян Тимирьянович штурмовой отрядын кугурак стрелокшо лийын. Специальный военный операций кайыме верлаште кредалмаш годым лӱддымылыкым ончыктымыжлан тудым «Участнику специальной военной операции», «За отвагу» медаль-влак дене суапландареныт. Конешне, пелашемын увер деч посна йоммыжо мыйын чонем туржеш, но ме сайлан ӱшанена. Иван СВО-ш каяш шонымыж нерген ойлымеке, мый тореш лийынам. Но тудо мыланем «Авай, ме вет элым аралаш шочынна, сандене кызыт тендам, элнам аралаш кӱлеш. Илышда сай лийже манын, ме кайышаш улына» манын. Кечын эргымын йыҥгыртымыжым але иктаж мутым возен колтымыжым вучен илем. Южгунам кум кече дене увер уке лиешат, чотак ойгырем, тургыжланем. Иван ик ий мӧҥгыштӧ лийын огыл. Кок шӱжарже да изи шольыжо изашт толмылан чот йывыртеныт, - чонжым почын каласкалыш Ксения.

Иван дене мутланыме годым тудын кеч-момат шонен ыштымыже, лӱддымӧ койыш-шоктышан улмыжо, Шочмо элым йӧратымыже шижалтыч. Рвезын ойлымыж почеш, салтак-влак кажне кечым куанен вашлийыт. Но вуйыштышт уто шонымашым огыт кучо, ончыкылыклан кугу планым огыт чоҥо. «Чылаж нерген шонаш тӱҥалат гын, тушманым шекланен от шукто», - манеш 20 ияш рвезе.

Лӱддымылыкым, чолгалыкым ончыктымыжлан И.А. Ибяевым «Шторм» отличий знак да Суворовын медальже дене палемденыт. Отпуск деч вара тудо уэш СВО-ш кая. Тыгай кызыт рвезын пӱрымашыже. Тудо кажне кечын сеҥымашым лишемдаш полша.