Лӱддымӧ, чолга улыт

Мемнан кундем гыч специальный военный операцийыш шуко пӧръеҥ каен. Акпарс, Биктыш, Усола, Уял, Урсай, Янахмат, Шалтык ялла гыч Акпарс школым тӱрлӧ ийлаште тунем лекше 40 рвезе СВО-н участникшылан шотлалтеш. 

«Кызытсе жапын геройжо-влак» стендыште шочмо элым аралымаште лӱддымылыкым ончыктышо выпускник-влакын фотографийыштым да нунын нерген кӱчык уверым вераҥдыме. Стендым Т.А. Минликаевлан да Г.И. Алтынбаевлан почаш ӱшанышт. Тимур Абдулгареевич - СВО-н участникше Георгий Минликаевын ачаже, Геннадий Ишмурзинович - СВО-што ӱмыр лугыч лийше Алексей Алтынбаевын изаже.

Тыгай патриотизм шӱлышан, кӱлешан мероприятийыш рвезе-влакын ачашт-авашт, родо-шочшышт, район вуйлатыше, волонтер, тунемше-влак погынышт. Фото гыч ончышо рвезе-влак мыланна герой улыт, вет нуно, шке илышыштым чаманыде, тушман ваштареш тавадаҥ шогалыныт. Пырдыжыште кызыт Россий армийыште служитлыше куд кадровый офицерын, тыгак сӧй пасуэш вуйым пыштыше вич салтакын фотоштым вераҥдыме.

«1941 ийысе сар годым кузе мемнан кочана-влак тушман ваштареш кредалаш каеныт, тугак таче мемнан самырык рвезына-влакат шочмо элым аралат. Тек нуно кушкын толшо тукымлан эре пример лийыт», - каласыш школ директор Г.Ф. Габдрахманова. А районысо Ветеран-влакын ушемыштым вуйлатыше М.Р. Саитов тыге палемдыш: «Тачысе мероприятий самырык-влаклан историй кылым пеҥгыдемдаш полша, шочмо элым ӱшанлын аралыше-влакым аклаш туныкта. Школ коллектив шуко пашам ышта, тунемше-влакым патриотизм шӱлышеш кушташ тӱрлӧ йӧным кычалеш». Минлифагил Рахимьянович школ музейлан СВО гыч кондымо боевой экспонат-влакым пӧлеклыш.

Мероприятийым вӱдышӧ-влак сай, эллан ӱшанле эрге-влакым куштымыштлан ачашт-аваштлан таум каласышт, а туныктышо-влак А.А. Асмаева, В.А. Гибадуллина, Е.Д. Курмакаева, М.Б. Шамыкаева погынышо калыкым нунын илыш-корнышт дене палдарышт. Ойлымышт годым экран гыч кажне геройын фотожым ончыктышт. Самырык герой-влакын патырлыкышт - тачысе тунемше-влаклан сай пример.

СВО-што вуйым пыштыше вич выпускникна нерген Н.М. Атнабаева чон вургыжын ойлыш. Нина Мардамшиновна Р. Рождественскийын «Реквием» почеламутшым туге лудын пуыш - залыште шинчыше кажне еҥын шинчавӱдшым луктын керте. Тунемше-влакат ятыр патриотический почеламутым лудыч, мурым мурышт.

Вашлиймашке И.Г. Гумерова толын ыле. Изольда Геннадьевнан пелашыже СВО-што контракт почеш служитла. Тале сарзыеҥын ватыже ныл гана СВО кайыме верлашке миен, шке машинаж дене салтак-влаклан гуманитарный полышым намиен. Марий ӱдырамаш районышто чолга волонтер семын палыме, «Патриот России» медаль дене палемдалтын. Изольда Геннадьевна шке ужын коштмыж нерген каласкалыш, салтак-влаклан мо дене полшаш лиймым умыландарыш. Волонтер-влак да школ коллектив боец-влаклан 3 маскировко сетьым да посылкым колтышт. Тыште чылан сарзе-влакын шочмо вер-шӧрыш таза-эсен пӧртылмыштым вучен илат да нунылан кузе-гынат полшаш тыршат. 

Кадровый офицерын аваже Л.Д. Курмакаева школ коллективлан тауштен ойлыш. Тудын эргыже, подполковник Валентин Курмакаев, Сирийыште лийын, кызыт - СВО-што. «Ме геройна-влак дене кугешнена. Эргына-влак патриотизм шӱлышеш шуаралтын кушкыныт, кугезе кочашт да кочашт деч примерым налын, тыныс илыш верч кредалыт. Ме чылан иктым гына тыланена - вашкерак тыныс илыш толжо. Тек кажне салтак, аважлан йыҥгыртен, «Авай, мый мӧҥгӧ пӧртылам» манеш», - каласыш Любовь Давлетгуловна.  

Мучашлан туныктышо-влак дене пырля чыланат патриотический муро-влакым мурышна да стенд воктен пырля шогал возалтна. Тиде стенд эреак шке сарзе порысыштым лӱддымын шуктышо чолга рвезына-влакым шарныкташ тӱҥалеш.